АШУҮИС-ийн Монгол-Японы эмнэлгийн Гэмтэл, согогийн мэс заслын тасгийн эмч нар робот тусламжтай өвдөгний үе солих мэс заслыг хийж эхэллээ.
Энэхүү технологийг Монгол Улсад анх 2023 онд АШУҮИС, АУС-ийн Гэмтэл согог судлалын тэнхмийн санаачлагаар АШУҮИС-ийн Монгол-Японы эмнэлэгт БНСУ-ын CUREXO компанийн мэргэжилтнүүд болон эмч нартай хамтран нэвтрүүлж, мөн 5 өвчтөнд робот тусламжтай өвдөгний үе суулгах х мэс заслыг амжилттай хийж байсан билээ.
Тэгвэл 2026 онд энэхүү дэвшилтэт технологийг Монгол-Японы эмнэлгийн Гэмтэл, согогийн мэс заслын эмч нар бие даан хэрэгжүүлж эхэлж байгаа нь Монголын эмч, мэргэжилтнүүдийн ур чадвар, технологийн чадавхыг бэхжүүлж, орчин үеийн мэс заслын технологийг эх орондоо нутагшуулж буйн нэгэн чухал үр дүн болж байна.
Роботын тусламжтай мэс заслын технологи нь мэс заслын өмнөх төлөвлөлт, яс тайрах хэмжээ, хиймэл үеийн байрлал болон үений тэнцвэржилтийг өндөр нарийвчлалтай тооцоолох боломжийг бүрдүүлдэг. Ингэснээр эмчийн мэргэжлийн ур чадвар, туршлагыг технологийн дэвшилтэй хослуулан мэс заслын нарийвчлалыг сайжруулах боломжтой юм.
Энэхүү технологийг нутагшуулах нээлтийн арга хэмжээг АШУҮИС-ийн Ректор, АУ-ны доктор Б.Дамдиндорж нээж, АШУҮИС-ийн удирдлагууд, багш, эмч, эмнэлгийн ажилтнууд болон БНСУ-ын NOV эмнэлгийн робот мэс заслын эмч Рюү Хо Кан, “Тимус Фарм” компанийн захирал Ш.Мухамед Жан, CUVIS робот төхөөрөмжийн компанийн инженер, холбогдох албаны төлөөлөлүүд оролцлоо.
АШУҮИС нь их сургуулийн эмнэлгийн тогтолцоог хөгжүүлэх хүрээнд шинэ технологийг эмнэлзүйн практикт нэвтрүүлэх, сургалт, судалгаатай уялдуулах чиглэлээр ажиллаж байгаа бөгөөд Монгол-Японы эмнэлгийн технологийн хөгжлийн нэг чиглэлд роботикоор өвдөгний хиймэл үе суулгах мэс заслыг багтаасан.
Сэтгэгдэл бичих