Төв аймгийн Прокурорын газраас тус аймгийн нутаг дэвсгэрт 2015 оноос 2019 оны 1 дүгээр улирлын байдлаар гарсан “Автотээврийн хэрэгслийн хөдөлгөөний аюулгүй байдал, ашиглалтын журам зөрчих” гэмт хэрэг, шийдвэрлэсэн байдлыг судалжээ.
Төв аймгийн нутаг дэвсгэрийг дайран өнгөрдөг авто замд гарсан 408 гэмт хэргийн улмаас 449 хүн гэмтэж, 207 хүний амь нас хохирч, иргэн, хуулийн этгээдэд2,491,179,809 төгрөгний хохирол учирчээ.
Гэмт хэрэг гарсан сумдаар нь авч үзвэл Сэргэлэн суманд 62, Баянчандмань суманд 44, Борнуур суманд 45, Аргалант суманд 39, Жаргалант сумын нутагт 21, Лүн суманд 24 гэмт хэрэг гарсан бол 333 буюу 81.6% нь өдрийн цагаар, 75 буюу 18.4% нь шөнийн цагаар гарчээ. Харин нийт осолд орсон тээврийн хэрэгслийн хувьд Тоёота Приус маркийн авто машин 107 буюу 20.2 хувийг эзэлсэн байна.
Сүүлийн 5 жилийн хугацаанд автотээврийн хэрэгслийн хөдөлгөөний аюулгүй байдал, ашиглалтын журам зөрчих гэмт хэрэг хамгийн их гарсан зам буюу “хар цэг”-ийг судлахад Сэргэлэн сумын Ногоон дов гэх газар 8, Хустайн даваа гэх газар 6, Борнуур сумын Урьхан гэх газар 7, Тайсын хөтөл гэх газар 11, Баянчандмань сумын Хөх хошуу гэх газар 8, Аргалант сумын Жирмийн цагаан гэх газар 5, Цагаан хөтөл гэх газар 7, Галзуу харын худаг гэх газар 6, Лүн сумын Цагаан хөтөл гэх газар 5 зам тээврийн осол гарчээ.
Дээрхи судалгааны дүнг үндэслэн тус аймгийн Прокурорын газраас Аймгийн Гэмт хэргээс урьдчилан сэргийлэх салбар зөвлөл, Аймгийн Засаг даргад танилцуулга хүргүүлэх, мэргэжлийн байгууллага, эрх бүхий албан тушаалтантай хамтарсан шалгалт хийх, зөвлөгөөн зохион байгуулах, замын анхааруулга, тэмдэг тэмдэглэгээг шинэчлэх, шинээр хийх, цагдаагийн байгууллагын хяналт шалгалтын суурин цэг, хөдөлгөөнт эргүүл ажиллуулах, цагдаагийн албан хаагчдын орон тоог нэмэгдүүлэх зэрэг удирдлага зохион байгуулалтын арга хэмжээг авч ажиллахаар болжээ.
Сэтгэгдэл бичих