Италийн ЧЕИ байгууллагын санхүүжилтээр хэрэгжиж буй “Монгол Улсын хөгжлийн бэрхшээлтэй хүүхдүүдэд сэргээн засах тусламж, үйлчилгээ үзүүлэх төсөл”-ийн хүрээнд “Тархины саатай хүүхдэд шагай тавхайн ортоз хийх арга зүй” сэдэвт сургалтыг 2026 оны 04 дүгээр сарын 1-ээс 5-ны өдрүүдэд Улаанбаатар хотноо зохион байгууллаа.
Үндэсний статистикийн хорооны 2024 оны мэдээгээр Монгол Улсад хөгжлийн бэрхшээлтэй 107.9 мянган хүн байгаа нь нийт хүн амын 3.1 хувийг эзэлж байна. Нийт хөгжлийн бэрхшээлтэй хүний 1.1 хувь буюу 14.6 мянга нь хүүхэд байна. Эдгээр хүүхдийн 3252 нь тархины саажилт, хөдөлгөөний бэрхшээлтэй байгаа нь нийт хөгжлийн бэрхшээлтэй хүүхдийн 22.3 хувийг эзэлж байна.
Бие бялдар сэргээн засах судлалын Монголын нийгэмлэг тус сургалтыг удирдан явуулж байгаа бөгөөд олон улсын туршлагатай мэргэжилтнүүд болох Хонг Конгийн Сэргээн засах судлалын нийгэмлэгийн гишүүн Шейла Пурвэс, мэргэжлийн протез, ортозын мэргэжилтэн, ДЭМБ-ын зөвлөх Вонг Вай Хинг Кеннет, Хөдөлмөр засалч, нийгмийн ажилтан Шейрли Цэ нар оролцож, тархины саатай хүүхдүүдэд зориулсан шагай тавхайн ортоз (AFO)-ыг 6 хүүхдэд хийж өгөх замаар чадавхжуулах, хөдөлмөр засалч мэргэжилтэнд саажилттай хүүхэдтэй ажиллах арга зүйн практик сургалтыг тус тус хийлээ.
Тус сургалтад Гэр бүл, хөдөлмөр, нийгмийн хамгааллын яамны харьяа Сэргээн засах төв, мөн орон нутаг дахь Хөгжлийн бэрхшээлтэй хүний хөгжлийн төвүүдийн туслах технологийн мэргэжилтнүүд, сэргээн засахын эмч, хөдөлмөр засалч нийт 22 мэргэжилтнийг хамруулснаар орон нутагт туслах технологийн үйлчилгээний чанар, хүртээмжийг нэмэгдүүлэх чухал алхам болж байна.
Тархины саатай хүүхдүүдэд шагай тавхайн ортоз хийлгэснээр үеийг зөв байрлалд оруулах, тогтвортой болгож үеийг хамгаалан алхахад хөлийг зөв гишгэгдэлтэйгээр үйл ажиллагаанд оролцуулж улмаар нийгмийн оролцоог нэмэгдүүлэх ач холбогдолтой юм.
Дээрх төслийн хүрээнд 2025 оны 09 дүгээр сард “Тархины саагийн сэргээн засах цогц тусламж, үйлчилгээ” сэдэвт сургалт хийж улсын хэмжээнд хөгжлийн бэрхшээлтэй хүүхдэд сэргээн засах тусламж, үйлчилгээ үзүүлдэг сэргээн засахын эмч, хөдөлгөөн, хөдөлмөр, хэл засалч нийт 67 хүнийг хамруулсан байна.
Сэтгэгдэл бичих