Торонтогийн хөрөнгийн биржид бүртгэлтэй “Эрдэнэ Ресурс Девелопмент” компанийн хэрэгжүүлж буй “Хөндий” алтны бүлэг ордын алтны агууламж өндөр байгааг компанийн зүгээс мэдээллээ.
“Хөндий” алтны ордын дундын бүсийн сонгогдсон талбайд 112 метр ухсан өрөмдлөгийн цооногоос 5.9 гр/тн агууламжтай алт илэрсэн бол гурван метрийн цооногоос 40 гр/тн, харин лицензийн талбайн хилийн бүсийн ойролцоо ухсан 210 метрийн цооногоос 51.9 гр/тн агууламжтай алт илэрсэн байна. Энэ нь компанийн хөрөнгө оруулагчдын анхны тооцоололтой дүйж байгаа хэрэг аж.
Өнгөрсөн гуравдугаар сард эхэлсэн өрөмдлөгийн ажил энэ сарын сүүлээр бүрэн дуусах тооцоотой байна. “Баян Хөндий” алтны ордын судалгааны ажил зургаадугаар сар гэхэд дууссаны дараа “Хойд Хөндий”, “Алтан Сум” ордын хайгуулын судалгааны ажилд шилжих юм. Өнгөрсөн гуравдугаар сард “Эрдэнэ Ресурс Девелопмент” компани Уул уурхай, хүнд үйлдвэрийн яаманд ашиглалтын лиценз болгох хүсэлтээ илэрхийлээд байна.
Сэтгэгдэл бичих