Шүүхийн нэр: Монгол Улсын дээд шүүх Захиргааны хэргийн танхим
Шүүхийн шийдвэрийн дугаар: 2026.03.17 001/ХТ2026/0030
Тоймын дугаар, огноо: №79 /ЗХТ 29/ 2026.04.03
Шийдвэрийн төлөв: Хүчин төгөлдөр болсон
Санамж: Энэхүү хураангуй тойм нь шүүхийн шийдвэрийг орлохгүй ба хууль хэрэглээний нэгдмэл байдлыг тогтооход дэмжлэг үзүүлэх, шүүхийн шийдвэрийн үндэслэлийг сурталчлах, олон нийтийг мэдээллээр хангах зорилготой болно.
Төрийн захиргааны албан хаагч А нь Монополын эсрэг газарт Өрсөлдөөний бодлого, зохицуулалтын газрын даргаар ажиллаж байхдаа, Монгол Улс болон Япон Улсын Засгийн газрын хоорондын гэрээний дагуу, тэтгэлэгтэй хөтөлбөрт тэнцэж, Кобэ их сургуульд хуулийн магистрын зэрэг хамгаалж ирсэн боловч захиргааны байгууллагаас урьд эрхэлж байсан албан тушаалд нь буцаан томилоогүй байна.
Анхан болон давж заалдах шатны шүүхээс Төрийн албаны хуулийн 46 дугаар зүйлийг хэрэглэж, “Төрийн албанаас түр чөлөөлөгдсөн тул шууд өмнө эрхэлж байсан ажилд томилох боломжгүй, харин тухайн байгууллагад сул орон тоо гарахад төрийн албаны нөөцөөс нэр дэвших боломжтой” гэж дүгнэснийг хяналтын шатны шүүхээс буруу гэж үзэв.
Учир нь, төрийн албыг мэргэшсэн, чадварлаг албан хаагчдаас бүрдүүлэх зорилгоор Засгийн газар хоорондын гэрээгээр төрийн албан хаагчдад тэтгэлэг олгож, түүнийг гадаадын өндөр хөгжилтэй оронд суралцуулж, туршлага, мэдлэг чадвар эзэмшүүлсэн тул буцаад уг ажилтныг мэргэжлийн дагуу өмнө эрхэлж байсан ажилд томилж, тогтвор суурьшилтай ажиллах боломж нөхцөлийг хангасан тохиолдолд төрийн албыг чадварлаг мэргэшсэн албан хаагчдаас бүрдэх хуулийн зорилго биелнэ.
Иймээс “Төрийн жинхэнэ албан хаагч нь 2 жил хүртэл хугацаагаар өндөр хөгжилтэй оронд магистр, докторын сургалтад хамрагдсан бол захиргааны байгууллага нь урьд эрхэлж байсан албан тушаалд буцаан томилох үүрэгтэй” гэсэн агуулгаар нэхэмжлэлийг хангаж, хариуцагчийг буруутай гэж үзэв.
Тойм бэлтгэсэн:Монгол Улсын дээд шүүхийн шүүгч П.Соёл-Эрдэнэ
Сэтгэгдэл бичих