CS2 төрлийн цахим спортын нэр хүндтэй PGL Bucharest 2026 тэмцээнд оролцож буй The Mongolz баг хэсгийн шатны хоёр дахь тоглолтоо амжилттай хийж, EYEBALLERS багийг 2:0 харьцаатайгаар буулган авлаа.
Ингэснээр Монголын баг хоёр дараалсан ялалт байгуулж, хэсгээс гарах боломжоо улам бататгасан байна. Тэд өмнө нь тэмцээний эхний тоглолтдоо BC.Game Esports багийг мөн 2:0-ээр хожсон бөгөөд тус багийг дэлхийн шилдэг тоглогчдын нэг s1mple ахалж байсан юм.
Одоо The Mongolz баг өнөөдөр шигшээ шатанд шалгарах эрхийн төлөө Данийн хүчирхэг Astralis багтай тоглохоор болжээ. Хоёр багийн тоглолт Улаанбаатарын цагаар 21:00 цагт эхлэх юм.
Эдгээр багууд хамгийн сүүлд IEM Chengdu 2025 тэмцээнд учраа таарч байсан бөгөөд тухайн үед Astralis баг ялалт байгуулж байв. Тиймээс энэ удаагийн тоглолт хариугаа авах, цааш шалгарах эрхийн төлөөх чухал тулаан болж байна.
Тэмцээний шагналын сангаас аварга баг 200,000 ам.доллар, дэд байр 93,750 ам.доллар, гуравдугаар байр 75,000 ам.доллар, харин тусгай байрт шалгарсан баг 43,750 ам.долларын шагнал хүртэх юм.
Ийнхүү Монголын The Mongolz баг дэлхийн шилдэг багуудтай өрсөлдөн амжилттай оролцож, дараагийн шатанд шалгарахын төлөө чухал тоглолтын өмнө ирээд байна.
Сэтгэгдэл бичих