“Аливаа үйл ажиллагаа тухайн нутаг дэвсгэрт амьдарч буй оршин суугчдын сэтгэлд нийцсэн байх ёстой. Гэтэл харамсалтай нь нийслэлийн иргэд өөрсдөө ийм хурдны зам барихыг хүсэхгүй байгаа бөгөөд үүний эсрэг жагсаал, цуглаан зохион байгуулж байна. Энэ нь маш том хүчин зүйл учраас зайлшгүй харгалзан үзэх шаардлагатай.
Аливаа бодлого, шийдвэрийг хэрэгжүүлэхдээ, тэр дундаа төсвийг захиран зарцуулахдаа иргэдийн санал бодол, хүсэл сонирхолд тулгуурлах нь зүйтэй. Үүнийг хууль, эрх зүйн хүрээнд ч тодорхой тусгах шаардлагатай. Гэвч бодит байдал дээр нийслэлийн төсөв хэрхэн батлагдаж, ямар журмаар зарцуулагдаж байгаа нь тодорхой бус хэвээр байна. Төсөв хаашаа, хэрхэн, юунд зарцуулагдаж байгааг олон нийт бүрэн мэдэхгүй байгаа нь асуудал дагуулж байна.
Ийм их хэмжээний, наядаар хэмжигдэх өртөг бүхий томоохон төслүүд ямар үндэслэл, судалгаанд тулгуурлан батлагдаж, хэрэгжиж байна вэ гэсэн асуулт зүй ёсоор гарч ирж байна. Сүүлийн үед төсөвтэй холбоотой асуудлууд олноор хөндөгдөж, аудит, хяналтыг сайжруулах шаардлагатайг олон хүн онцолж байна.
Мөн төсвийн хөрөнгөөр хэрэгжиж буй зам, гүүрийн ажлуудыг туршлагагүй, мэргэжлийн бус компаниуд гүйцэтгэж байна гэх мэдээлэл яригдаж байгаа нь худалдан авалтын үйл явц ил тод, шударга явагдаж байгаа эсэхэд эргэлзээ төрүүлж байна.
Ийм нөхцөлд уг төслийг хэрэгжүүлэх нь зөв үү, буруу юу, нийслэлийн иргэд үнэхээр дэмжиж байна уу гэдэг асуулт нээлттэй хэвээр байна. Түгжрэлийг 30 хувиар бууруулна гэж байгаа ч мэргэжлийн хүмүүсийн үзэж байгаагаар уг төсөлд тодорхой эрсдэл, дутагдал байж болзошгүй юм.”
Сэтгэгдэл бичих