К-поп ертөнцийн хамгийн алдартай хамтлаг болох BTS-ийн гишүүд цэргийн албаа бүрэн хааж дууссаны дараа анх удаа бүрэн бүрэлдэхүүнээрээ эргэн нэгдэж, өнөөдөр буюу бямба гарагт Сөүл хотноо тоглолтоо толилуулах гэж байна.
“BTS The Comeback Live: Arirang” нэртэй уг тоглолт хотын төвд байрлах Гванхамүн талбай-д орой 20:00 цагт эхлэх бөгөөд тус хамтлагийн дөрөв шахам жилийн дараа гаргасан тав дахь студийн цомог болох “Arirang”-ийн нээлтэд зориулагдсан юм. Удаан хүлээлгэсэн энэхүү тоглолтыг дэлхийн өнцөг булан бүрд байгаа шүтэн бишрэгчдэд Netflix платформоор анх удаа шууд дамжуулах гэж байна.
Зохион байгуулагчдын мэдээлснээр тоглолтыг үзэхээр 260 мянга орчим хүн цуглах төлөвтэй байгаа нь 2002 оны Хөл бөмбөгийн ДАШТ 2002-ийн үеэр Сөүлд бүртгэгдсэн 250 мянган үзэгчийн рекордыг давах магадлалтай байна.
Энэхүү төслийг HYBE болон Netflix хамтран хэрэгжүүлж байгаа бөгөөд стриминг платформын хувьд хөгжмийн томоохон тоглолтыг шууд дамжуулж буй анхны тохиолдол болж байгаагаараа онцлогтой.
Үүнээс гадна BTS хамтлаг шинэ цомгийнхоо хүрээнд “BTS The City Arirang Seoul” нэртэй соёлын цогц үйл ажиллагааг зохион байгуулж эхэлсэн бөгөөд хөгжим, медиа арт, хотын инсталляцыг хослуулсан энэхүү арга хэмжээ дөрөвдүгээр сарын 1-ний өдөр хүртэл Сөүл хот даяар үргэлжлэх юм.
Сэтгэгдэл бичих