Иргэд сайн дурын үндсэн дээр цусаа хандивласнаар олон хүний амийг аврах боломж бүрддэг. Нэг донорын өгсөн цус гурав хүртэл хүний амь насыг аврах боломжтой байдаг талаар эмч, мэргэжилтнүүд хэлдэг байна. Цус сэлбэлтийн үндэсний төв дээр “Сар бүр-3” аяныг зохион байгуулж өдөр бүр 8:30-13:00 цаг хүртэл цус цуглуулах ажлыг хийдэг. Мөн цусаа хандивлах иргэнд ажлын газраас хоёр цагийн чөлөө олгодог байна.
Ингэхдээ Донор цусны төвд очиж бүртгэл хийлгэн, эрүүл мэндийн талаарх товч асуулга бөглөдөг.
Бүртгэлийн шат ойролцоогоор 5-10 минут үргэлжилдэг байна. Үүний дараа эмч нар донорын эрүүл мэндийн урьдчилсан үзлэг хийдэг. Үзлэгийн үеэр цусны даралт хэмжих, биеийн жинг шалгах, хуруунаас бага хэмжээний цус авч гемоглобины түвшинг тодорхойлох зэрэг шалгалтыг хийдэг бөгөөд энэ шат 10-15 минут орчим үргэлжилдэг.
Шалгалтын хариу хэвийн гарсан тохиолдолд донороос 350-450 мл орчим цус авдаг. Цус авах үйл явц ихэвчлэн 8-12 минут үргэлжилдэг байна. Цус өгсний дараа донор 10-15 минут амарч, шингэн зүйл ууж биеэ сэргээхийг эмч нар зөвлөж байна. Мөн тухайн өдөртөө хүнд хүчир ажил хийхгүй байх, шингэн сайн уух шаардлагатай аж. Эмч, мэргэжилтнүүдийн мэдээлснээр 18-60 насны, 50 кг-аас дээш жинтэй, эрүүл мэндийн ноцтой өвчингүй иргэд цус хандивлах боломжтой юм.
Сэтгэгдэл бичих