ОХУ-ын далбаатай шингэрүүлсэн байгалийн хий тээвэрлэгч танкер энэ долоо хоногийн эхээр Газар дундын тэнгист дроны халдлагад өртөж живсэн. Энэхүү халдлагын цаана Украин байгаа гэж Владимир Путин мэдэгдээд байна. Тэрбээр “Энэ бол террорист халдлага. Иймэрхүү зүйлийг бид анх удаа үзэж байгаа юм биш” гэж хэлжээ.
Украины тэнгисийн цэргийн нисгэгчгүй онгоц Европын холбооны гишүүн Мальта улсын нутаг дэвсгэрийн ойролцоо “Арктик Метагаз” шингэрүүлсэн байгалийн хий тээвэрлэгч хөлөг онгоцыг онилсон гэж Оросын Тээврийн яам үүний өмнөхөн мэдэгдсэн билээ. Танкер нь Мурманск боомтоос олон улсын дүрэм журмын бүрэн дагуу баримтжуулсан ачаа тээвэрлэж байжээ. Мөн цохилт өгсөн нисгэгчгүй онгоцыг Ливийн эргээс хөөргөсөн байсан гэв. Оросын Тээврийн яам энэ халдлагыг олон улсын терроризм, далайн дээрэмчний үйлдэл гэжээ.
Мальта болон Оросын аврагчид байгалийн хий тээвэрлэгч хөлгийн багийн 30 гишүүнийг бүгдийг нь аварсан байна.
Украины талаас энэ хэрэг дээр ямар нэг тайлбар өгөөгүй байна.
“Арктик Метагаз” танкер АНУ, Их Британийн хоригт байдаг. Тухайн халдлага болсон өдөр Мальтагийн зэвсэгт хүчин “Арктик Метагаз”-аас гамшгийн дохио хүлээн авсан аж. Хөлгийн багийнхныг Ливийн бүс нутагт аврах завин дээр хөвж явахад нь сүүлд олсон аж.
Сэтгэгдэл бичих