АНУ-ын ерөнхийлөгч Дональд Трампын Флорида дахь Мар-а-Лаго харшийн аюулгүй периметрт нэвтэрсэн эр буудуулж нас барсныг Ерөнхийлөгчийн нууц алба мэдээллээ. Тухайн хүн пулемёт буу болон шатахуун биедээ авч явж байжээ. Энэ хэрэг Ням гаригийн /2026.02.22/ 01:30 цаг орчимд гарсан бөгөөд ерөнхийлөгч тухайн үед Вашингтон ДС-д байсан аж.
Сэжигтэн этгээд нь Хойд Каролинагаас гаралтай Остин Т Мартин гэх хүн байжээ. Түүний алга болчихлоо гэх мэдээллийг гэрийнхэн нь Ням гаригийн 00:00 цагаас хойш цагдаад өгсөн байна. Албаныхан түүнийг Хойд Каролинагаас Флорида хүрэх замдаа буугаа худалдаж авсан эсэхийг шалгаж байна.
Түүнийг Мар-а-Лаго харшийн хойд хаалганд дөхөж байхад нь Ерөнхийлөгчийн нууц албаны агентууд илрүүлэн, улмаар гал нээжээ. Палм Бич хошууны шерифийн мэдээлснээр, Остин Т Мартин тушаал биелүүлээгүй учир буудахаас өөр аргагүй байсан аж. Гарт байгаа эд зүйлсээ буулга гэж түүнд тушаасан боловч зөвхөн шатахуунтай саваа буулгачихаад, буугаа шагайжээ.
Мар-а-Лаго харш өндөр хамгаалалт дор байдаг. Тодруулбал, харшийн гадна талын хамгаалалтыг Палм Бичийн шерифүүд, дотор талыг Ерөнхийлөгчийн нууц албаныхан хариуцдаг. Харшид зочилж буй хүмүүсийн цүнх, машин зэргийг нохой болон метал илрүүлэгчээр нэгжиж, шалгадаг аж.
Сэтгэгдэл бичих