Францын ерөнхийлөгч Эммануэль Макрон 15-аас доош насны хүүхдүүдийг сошиал сүлжээ ашиглахыг хориглох хуулийн төслийг яаралтай хэлэлцэж, батлахыг засгийн газарт үүрэг болгожээ. “BFMTV”-ийн мэдээлснээр, уг хуулийн төслийг долоо хоногийн эхээр Ерөнхий ассамблейд, ерөнхийлөгчийн олонхын бүлэгт зориулсан хуралдаанаар хэлэлцэхээр төлөвлөж байна. Засгийн газар хуулийг хурдан батлуулахын тулд хурдасгасан журам хэрэгжүүлж байгаа аж.
Макрон сошиал сүлжээ, ялангуяа “TikTok”-ийн хүүхэд, өсвөр үеийнхэнд үзүүлэх нөлөөг судалсан парламентын шалгалтыг удирдсан гишүүн Лор Миллерт талархал илэрхийлжээ. Засгийн газар түүний боловсруулсан хуулийн төслийг дэмжихээр шийдсэн бөгөөд Макрон үүнийг улс төрийн тодорхой амлалтын нэг хэсэг гэв.
Түүний хэлснээр, уг хуулийн гол зорилго нь дэлгэцийн хэт их хэрэглээ, сошиал сүлжээний алгоритмын сөрөг нөлөөнөөс хүүхэд, өсвөр үеийнхнийг хамгаалах явдал юм. Тэрбээр залуу хүмүүсийн сэтгэл зүй, сэтгэл хөдлөлийг технологийн компаниуд ашиг олох хэрэгсэл болгож болохгүйг онцолсон байна.
Хуулийн төсөлд 15-аас доош насныханд сошиал сүлжээ хэрэглэхийг хориглохоос гадна сургуулиудад, тэр дундаа ахлах сургуулиудад гар утас ашиглахыг хязгаарлана.
Ийм төрлийн хязгаарлалт нь цэцэрлэгээс дунд сургууль хүртэл аль хэдийн хэрэгждэг ч мөрдөлт нь жигд биш байсаар ирсэн. Бусад улс орнууд ч ижил төстэй арга хэмжээ авч эхэлсэн. Австрали улс 16-аас доош насныханд сошиал сүлжээ ашиглахыг хориглосон дэлхийн анхны улс болсон. Энэ хүрээнд “Instagram”, “TikTok”, “Facebook”, “YouTube” зэрэг томоохон платформууд насанд хүрээгүй хэрэглэгчдийн хандалтыг хаахгүй бол өндөр торгууль төлөх эрсдэлтэй болсон.
Европын бусад орнуудад ч ийм төрлийн бодлого хэлэлцээний шатанд явж байна. Дани улс 15-аас доош насныханд эцэг эхийн зөвшөөрөлтэйгөөр сошиал сүлжээ ашиглах хувилбарыг хэлэлцсэн. Мөн Европын холбооны зарим гишүүн орнууд нас баталгаажуулах тогтолцоо, платформуудад тавих шаардлагыг чангатгах замаар хүүхэд, залуусын эрсдэлийг бууруулах арга хэмжээг хэлэлцэж байна.
ЭХ СУРВАЛЖ:NEWS.MN
Сэтгэгдэл бичих