Швейцар улсын Кранс-Монтана хотод шинэ жилийн баярын үдэш гарсан ноцтой гал түймрийн улмаас 40 хүн амь үрэгдэж, олон арван хүн гэмтэж бэртсэн хэрэгтэй холбоотойгоор урьдчилсан шалгалтын дүн гарч эхэллээ. Одоогоор ил болсон мэдээллээр, гал гарсан “Le Constellation” баар нь галын аюулгүй байдлын заавал хийх ёстой шалгалтуудыг сүүлийн хэдэн жилийн турш огт хамрагдаагүй нь тогтоогдсон байна.
Хотын захиргаанаас мэдээлснээр, тус баар 2019 оноос хойш галын аюулгүй байдлын хяналт, шалгалтад ороогүй бөгөөд энэ нь олон нийтийн үйлчилгээний газарт ноцтой зөрчилд тооцогддог аж. Холбогдох дүрэм журмаар ийм төрлийн байгууламжууд жил бүр тогтмол шалгалтад хамрагдах үүрэгтэй байдаг.
Анхны дүгнэлтээр гал чимэглэлийн зориулалттай оч гаргагч лаа (sparkler)-наас үүдэн тааз болон шатамхай материалд хурдан тархсан байж болзошгүй гэж үзэж байна. Гал маш богино хугацаанд дэгдсэн нь дотор байсан хүмүүсийг аюулгүй гарч амжих боломжийг хязгаарласан талаар аврагчид мэдээлжээ.
Одоогоор Швейцарийн мөрдөн шалгах байгууллагууд ослын шалтгаан, хариуцлагын асуудлыг нягталж, тус баарын удирдлагуудын үйл ажиллагаанд хайнга хандсан эсэхийг шалгаж байна. Хэрэгт холбогдуулан эрүүгийн хэрэг нээсэн ч албан ёсоор баривчилгаа хийгдээгүй байгаа юм.
Сэтгэгдэл бичих