Лас Вегас, АНУ. — Дэлхийн хэрэглээний электроникийн хамгийн том арга хэмжээ болох CES 2026 АНУ-ын Лас Вегас хотод үргэлжилж байна. Жил бүр дэлхийн технологийн хөгжлийн чиг хандлагыг тодорхойлдог уг үзэсгэлэн энэ жил хиймэл оюун ухаан (AI), роботик, өндөр хүчин чадлын чип, ухаалаг гэр болон эрүүл мэндийн технологи-оор онцлог болж байна. Энэ удаагийн CES-ийн тайзнаа хиймэл оюун ухаан бараг бүх салбарт нэвтэрснийг томоохон компаниудын танилцуулга харууллаа. NVIDIA шинэ үеийн AI тооцооллын платформоо танилцуулж, хиймэл оюун ухааны сургалт, дата боловсруулалтын хүчин чадлыг огцом нэмэгдүүлэх шийдлүүдийг дэлгэлээ. Харин AMD дата төв, суперкомпьютерт зориулсан AI-д суурилсан шинэ чипүүдээ танилцуулж, өндөр гүйцэтгэлийн зах зээлд өрсөлдөх байр сууриа бэхжүүлэв.
Samsung CES 2026-д хамгийн тод гэрэлтэй, том хэмжээний шинэ үеийн дэлгэц, AI-д суурилсан ухаалаг ТВ-г танилцуулж, гэр ахуйн электроникийн ирээдүйг тодорхойлох зорилт тавьж байгаагаа илэрхийллээ. Дэлгэцийн технологи нь зөвхөн зурагт төдийгүй бизнес, сурталчилгаа, ухаалаг орчинд өргөн ашиглагдах боломжтойг онцлов.CES 2026-ийн нэгэн сонирхолтой хэсэг нь гэр ахуйн болон үйлчилгээний робот байв. Томоохон үйлдвэрлэгчид AI-д суурилсан, хүний өдөр тутмын амьдралыг хөнгөвчлөх робот туслахуудыг танилцуулж, ирэх жилүүдэд роботик технологи бодит хэрэглээнд улам ойртох төлөвтэй байгааг харууллаа. Үзэсгэлэнд мөн зүүж болох төхөөрөмж (wearables), алсын зайнаас оношлох AI-шийдлүүд, ухаалаг тээврийн технологиуд олноороо танилцуулагдав. Эдгээр нь эрүүл мэндийн үйлчилгээний хүртээмжийг нэмэгдүүлэх, хотын хөдөлгөөнийг ухаалгаар зохицуулахад чиглэж байна.
Сэтгэгдэл бичих