Дэлхийн хэмжээнд уур амьсгалын өөрчлөлтөөс үүдэлтэй байгалийн гамшгийн эрсдэл улам нэмэгдэж, түүний эдийн засгийн үр дагавар ноцтой хэмжээнд хүрч байгааг олон улсын шинжээчид анхааруулж байна. Swiss Re Institute-ийн хамгийн сүүлийн тайланд дурдсанаар, 2025 онд байгалийн гамшгаас үүдэлтэй даатгалын хохирол 107 тэрбум ам.долларт хүрэх төлөвтэй байгаа нь түүхэн дээд үзүүлэлтүүдийн нэг болж байна.
Тус тайланд дурдсанаар, энэ нь дараалсан зургаа дахь жилдээ байгалийн гамшгийн улмаас учирсан даатгалын нийт хохирол 100 тэрбум ам.доллароос давж буй тохиолдол юм. Хохирлын гол шалтгаанд АНУ-ын Калифорни мужид гарсан их хэмжээний ой, хээрийн түймэр, мөн дэлхийн олон бүс нутагт давтамж нь нэмэгдсэн хүчтэй шуурга, аадар бороо, үер усны гамшиг зонхилж байна.
Ялангуяа Өмнөд Калифорнид гарсан ой хээрийн түймрүүд нь даатгалын салбарын түүхэнд хамгийн их зардал дагуулсан түймрийн тоонд орж, ганц бүс нутагт олон тэрбум ам.долларын хохирол учруулжээ. Үүнээс гадна Европ, Ази, Америк тивийн зарим орнуудад болсон хүчтэй цаг агаарын үзэгдлүүд дэд бүтэц, орон сууц, бизнесийн үйл ажиллагаанд ихээхэн дарамт үзүүлсэн байна.
Шинжээчдийн үзэж буйгаар, эдгээр үзэгдэл нь дан ганц тохиолдлын шинжтэй бус, уур амьсгалын өөрчлөлтийн урт хугацааны нөлөө бодитоор илэрч буйн тод жишээ юм. Дулаарал, хур тунадасны хэлбэлзэл, хуурайшилт зэрэг нь байгалийн гамшгийн эрч хүч, давтамжийг нэмэгдүүлж, улмаар даатгалын болон эдийн засгийн эрсдэлийг улам гүнзгийрүүлж байна.
Swiss Re Institute-ийн тайланд мөн даатгалын компаниуд өндөр эрсдэлтэй бүс нутгуудаас татгалзах, эсвэл шимтгэлийг нэмэгдүүлэх хандлага ажиглагдаж эхэлснийг онцолсон байна. Энэ нь иргэд, бизнес эрхлэгчдэд санхүүгийн илүү их дарамт үүсгэж, зарим бүс нутагт даатгалын хамгаалалт сулрах эрсдэл бий болгож байгааг анхааруулжээ.
Ийм нөхцөлд олон улсын байгууллагууд, засгийн газрууд уур амьсгалын өөрчлөлттэй тэмцэх бодлогоо эрчимжүүлэх, эрсдэлийг бууруулах дасан зохицох арга хэмжээг нэн даруй хэрэгжүүлэх шаардлагатай байгааг шинжээчид онцолж байна. Байгалийн гамшгийн эдийн засгийн өртөг өссөөр байвал энэ нь зөвхөн байгаль орчны асуудал бус, дэлхийн эдийн засгийн тогтвортой байдалд заналхийлэх томоохон сорилт болж хувирах эрсдэлтэй байна.
Эх сурвалж: Swiss Re Institute
Огноо: 2025 оны 12 дугаар сарын 16
Сэтгэгдэл бичих