2025 оны 12-р сарын 1 — Дэлхийн Эрүүл Мэндийн Байгууллага (ДЭМБ) өнөөдөр таргалалт болон илүүдэл жингийн эмчилгээний чиглэлд томоохон ахицтай алхам хийж, GLP-1 төрлийн эмүүдийн хэрэглээнд зориулсан анхны дэлхийн хэмжээний удирдамжийг албан ёсоор танилцууллаа. Энэхүү удирдамж нь таргалалттай тэмцэх нэгдсэн бодлогыг бий болгох, эмийн хэт хэрэглээг хянах, эмийн хүртээмжийг хөгжиж буй орнуудад нэмэгдүүлэх зорилготой юм.
Шинэ удирдамжид GLP-1 рецептор агонистууд болох семаглутид зэрэг эмүүдийг зөвхөн эмчийн хяналт дор, эрсдэл ба ашигыг нарийвчлан үнэлсний үндсэн дээр хэрэглэх шаардлагатайг онцолсон байна. ДЭМБ энэ төрлийн эмүүдийн эрэлт огцом өсөж, зарим оронд хомсдол үүссэнтэй холбогдуулан зохистой хэрэглээний хүрээ, боломжит эрсдэлийг тодорхойлох нь зайлшгүй гэдгийг тэмдэглэв.
Тус байгууллага таргалалт нь дэлхий дахинд халдварт бус өвчний гол шалтгаануудын нэг болж, жил бүр олон сая хүний амь нас, амьдралын чанарт нөлөөлж буйг онцлон, шинэ удирдамж нь эрүүл мэндийн тогтолцоонуудын бодлого, санхүүжилт, нийгмийн эрүүл мэндийн стратегид шинэ өөрчлөлт авчрах магадлалтайг мэдэгдэв.
ДЭМБ-ын мэргэжилтнүүдийн хэлснээр, GLP-1 төрлийн эмүүд илүүдэл жинг бууруулахад өндөр үр дүнтэй хэдий ч, зөвхөн эмийн хэрэглээгээр бус, хооллолт, хөдөлгөөний хэв маяг, эрүүл амьдралын дадлыг хослуулах нь урт хугацааны үр дүнг баталгаажуулна гэжээ.
Шинэ удирдамж нь улс орнуудын эрүүл мэндийн яамд, бодлого боловсруулагчид болон эрүүл мэндийн байгууллагуудад чиглэсэн бөгөөд таргалалтын эсрэг олон улсын хариу арга хэмжээг уялдуулахад чухал алхам болохыг ДЭМБ мэдэгдсэн байна.
Эх сурвалж: Дэлхийн Эрүүл Мэндийн Байгууллага (WHO)
“WHO issues global guideline on the use of GLP-1 medicines in treating obesity” — 2025.12.01
Сэтгэгдэл бичих