Сонгинохайрхан Эрүүл мэндийн төвийн яаралтай тусламжийн тасгаар хоногт 308 хүүхэд үйлчлүүлжээ

Эрүүл мэндийн сайд Ж.Чинбүрэн Сонгинохайрхан Нэгдсэн Эмнэлэгт ажиллалаа.(2025.11.27)
Сонгинохайрхан Нэгдсэн эмнэлгийн Яаралтай тусламжийн тасагт сүүлийн 7 хоногт нийт 2285 хүүхэд үйлчлүүлснээс 389 хүүхэд хэвтэн эмчлүүлж, 1896 хүүхдэд үзлэг хийн, гэрийн эмчилгээ зөвлөжээ. Яаралтай тусламжийн тасагт хандсан хүүхдүүдийн дийлэнх хувийг 5-14 насныхан эзэлж байна.

Сонгинохайрхан нэгдсэн эмнэлэг нь нийт 365 ортой. Үүнээс хүүхдийн эрчимт эмчилгээ болон хэвтэн эмчлүүлэх 140 ортой. Нэмэлтээр 40 ор дэлгэн хүүхдийн тасагт нийт 180 ортой ажиллаж байна. Орны эргэлт одоогийн байдлаар 93 хувьтай.

2025-2026 оны томуугийн улирал эхэлснээс хойж буюу 10 сарын 14-өөс 11 сарын 24-ны хооронд ХӨСҮТ-ийн  вирус судлалын лабораторид нийт 81 сорьц илгээж шинжлэхэд  A(H3N2), амьсгалын замын синцитиаль, иж томуу, AЗСВ вирусууд тодорхойлогджээ.
Мөн 11-р сарын 27 өдрийн байдлаар эмнэлэгт хэвтэн эмчлүүлж буй 286 хүүхдээс асуумжийн аргаар томуугийн эсрэг дархлаажуулалтын хамралтыг судлахад 51 хүүхэд буюу 18 хувь нь хамрагдсан, 232 буюу 82 хувь нь хамрагдаагүй байна.


Эрүүл мэндийн сайд Ж.Чинбүрэн: Улирлын томуугийн дэгдэлт улсын хэмжээнд алаг цоог дэгдэлтээс “Улсын хэмжээний дэгдэлт”-ийн түвшинд шилжиж нэмэгдсэн тул эрчимт эмчилгээ болон хүүхдийн орны зохицуулалтад анхаарч ажиллах, Өрхийн эрүүл мэндийн төвүүдтэйгээ уялдаа холбоогоо сайжруулан, ажиглалт хийх хугацааны эмчилгээ, заавар зөвлөмжийг иргэдэд сайтар тайлбарлан өгч ажиллахыг даалгалаа.




Сонгинохайран Нэгдсэн эмнэлэг хүүхдийн 40 ортой нэмэлт тасаг нээж, 11-р сарын 24-ны өдрөөс жижүүрийн хүүхдийн эмчийг нэмэгдүүлж, хүүхдийн үзлэгийг 4 цэгээр явуулж байна. Мөн Яаралтай тусламжийн тасагт эрэмбэлэн ангилалтын ажилтны тоог 8 болгон нэмэгдүүж үзлэгийн эргэлтийг эрчимжүүлэн ажиллаж байгаа талаар тус эмнэлгийн  Эмнэл зүй эрхэлсэн дэд захирал Д.Сүнжидмаа хэллээ.