Баянзүрх дүүргийн Прокурорын газраас зорчих эрхийг хязгаарлах ялын хэрэгжилтэд хяналт тавих, хүний эрхийн зөрчил гаргахгүй байх нөхцөлийг хангах зорилгоор Нийслэлийн шүүхийн шийдвэр гүйцэтгэх газрын шийдвэр гүйцэтгэгч нартай хамтран 2025 оны 10 дугаар сарын 5-наас 20-ны өдрүүдэд гэнэтийн шалгалт, хяналт, танилцах ажиллагааг зохион байгуулжээ.
Шалгалтын үеэр зорчих эрхийг хязгаарлах ял эдэлж буй ялтнуудын оршин суугаа хаяг, ажлын байр болон цахим бугуйвчны байршил дээр очиж, биечлэн хяналт тавьсан байна. Мөн цахим бугуйвчны дагалдах хэрэгсэл гэмтсэн ялтнуудын төхөөрөмжийг газар дээр нь засварлах, шаардлагатай тохиолдолд шинэ бугуйвчаар солих зэрэг арга хэмжээг авсан байна.
Эдгээр ажлын үр дүнд нийт 19 ялтны зөрчигдсөн эрхийг сэргээж, зорчих эрхийг хязгаарлах ялын хэрэгжилтийг сайжруулах, хяналтын үр нөлөөг дээшлүүлэхэд чухал үр дүн үзүүлсэн гэж Баянзүрх дүүргийн Прокурорын газраас мэдээллээ.
Discussion about this post