Нэхэмжлэгч Н нь 2016 оны 04 дүгээр сард Байгаль орчин, ногоон хөгжил, аялал жуулчлалын сайдын /хуучин нэрээр/ Газар ашиглах эрх олгох тушаалаар Богдхан уулын дархан цаазат газрын Төрхурахын аманд 3.0 га талбайг аялал жуулчлалын зориулалттайгаар газар ашиглах гэрчилгээг 5 жилийн хугацаатайгаар авчээ. Үүнээс хойш 2021 оны 3 дугаар сард Н-н газар ашиглах эрхийг, газрын төлбөрийг төлөөгүй үндэслэлээр цуцалсан ба Н уг тушаалыг эс зөвшөөрч, захиргааны шүүхэд нэхэмжлэл гаргасны дагуу шүүхээс нэхэмжлэлийн шаардлагыг хангаж, 2022 онд тус яамны сайдын тушаалаар Н-н газар ашиглах эрхийг буцаан сэргээсэн байдаг.
Иймд Н газар ашиглах гэрчилгээний хугацааг сунгуулах хүсэлтээ Богдхан уулын Дархан цаазат газрын хамгаалалтын захиргаанд гаргахад газрын төлбөрийн тооцоогүй тухай тодорхойлолт шаарддаг. Н БЗД-ийн газрын албанаас өр төлбөргүй гэсэн тодорхойлолт хүсэхэд нэхэмжлэлээр газрын төлбөр үүссэн байна тиймээс төлбөрийн тооцоотой мөн өр төлбөргүй гэх тодорхойлолт гаргаж өгөх үндэслэлгүй гэж хариу өгсөн. Н шийдвэрийг эс зөвшөөрч тус дүүргийн Засаг даргад гомдол гаргасан боловч, мөн ийм тодорхойлолт гаргах боломжгүй гэсэн хариу өгсөн байдаг. Иймд Н нь Баянзүрх дүүргийн Газар зохион байгуулалтын нэгдүгээр албаны 2022 оны 10 дугаар сарын …. дугаар татгалзсан шийдвэрийг хүчингүй болгуулах, Төрхурахын аманд байрлах 3 га газар дээр төлбөргүй тухай тодорхойлолт гаргаж өгөхийг Газар зохион байгуулалтын нэгдүгээр албанд даалгах, газрыг ашигласны төлбөр төлөх үүрэг үүсэхгүй болохыг тогтоолгож, Баянзүрх дүүргийн Газар зохион байгуулалтын нэгдүгээр алба, Богдхан уулын дархан цаазат газрын хамгаалалтын захиргаагаар хүлээн зөвшөөрүүлэх нэхэмжлэлийн шаардлага гарган шүүхэд нэхэмжлэл гаргасан.
Анхан шатны шүүхээс нэхэмжлэлийн шаардлагаас зарим хэсгийг хангаж, шийдвэрлэсэн бол давж заалдах шатны шүүх нэхэмжлэлийн шаардлагын хангасан хэсгийг хэвээр үлдээж шийдвэрлэсэн байдаг.
Хяналтын шатны шүүхээс тус маргааныг 2025 оны 11 дүгээр сарын 04-ний өдөр хянан хэлэлцүүлээд, давж заалдах шатны шүүхийн магадлалыг хэвээр үлдээж, нэхэмжлэгч, түүний өмгөөлөгчийн гаргасан гомдлыг хангахгүй орхиж шийдвэрлэлээ.
Сэтгэгдэл бичих