Эдийн засаг, хөгжлийн яамны Төрийн нарийн бичгийн дарга И.Батхүү Европын хөрөнгө оруулалтын банкны Хятад болон Монгол дахь төлөөлөгчийн газрын дарга Ралф Аямар, Зээлийн төсөл болон улс хариуцсан ахлах мэргэжилтэн Жан-Филлип Стийнс, Европын Холбооны Олон улсын хамтын ажиллагааны газрын бүс хариуцсан хамтын ажиллагааны тэргүүн Том Корри болон Монгол Улс дахь төлөөлөгчийн газрын Хамтын ажиллагааны газрын дарга Адриен Мург нарыг хүлээн авч уулзлаа.
Уулзалтын үеэр 2026–2028 оны Төсвийн хүрээний мэдэгдэл, Монгол Улсыг 2026–2030 онд хөгжүүлэх таван жилийн үндсэн чиглэл, Улсын Их Хуралд өргөн мэдүүлэхээр бэлтгэж буй “Эдийн засийн эрх чөлөөний тухай хууль”-ийн зорилго болон хувийн хэвшлийг дэмжих, хөрөнгө оруулалтын орчныг сайжруулах, төр-хувийн хэвшлийн түншлэлийг өргөжүүлэх чиглэлээр авч хэрэгжүүлж буй арга хэмжээний талаар мэдээлэл өглөө.
Европын хөрөнгө оруулалтын банкны төлөөлөгчид Монгол Улстай хамтын ажиллагаагаа цаашид өргөжүүлэх хүсэлтэй байгаагаа илэрхийлж, ялангуяа эрчим хүчний салбарын шинэчлэлийг дэмжих хүрээнд сэргээгдэх эрчим хүчийг хөгжүүлэх, цэнэг хураагуур болон дамжуулах шугамын төслүүдийг хэрэгжүүлэхэд санхүүжилтийн олон төрлийн механизмыг ашиглах, мөн олон талт хөгжлийн байгууллагуудтай хамтран ажиллах боломжийг эрэлхийлж байгаагаа онцоллоо.
Талууд Монгол Улсын Засгийн газар болон Европын хөрөнгө оруулалтын банк хооронд байгуулсан Харилцан ойлголцлын санамж бичгийн талаар болон Европын Холбооны санаачилгуудын хүрээнд Монголд чиглэсэн хөрөнгө оруулалтын боломжуудыг хэлэлцэв. Түүнчлэн өнгөрсөн хугацаанд Азийн хөгжлийн банк болон Европын хөрөнгө оруулалтын банк, Европын Холбооны хамтарсан санхүүжилтээр хэрэгжүүлж буй гэр хорооллын дахин төлөвлөлтийг дэмжсэн олон үе шаттай “Улаанбаатар хотын гэр хорооллыг хөгжүүлэх, хөрөнгө оруулалтыг дэмжих хөтөлбөр” (GADIP) төдийгүй бүс нутгийн хэмжээнд нийгэм, эдийн засгийн хөгжлийг дэмжих “Аймаг, сумын бүсчилсэн ногоон хөгжлийн хөрөнгө оруулалтын хөтөлбөр” (ASDIP)-ийг амжилттай хэрэгжүүлэхэд анхаарч ажиллахаа талууд илэрхийлэв.
Сэтгэгдэл бичих