Японы нийслэл Токиод 56 настай Коичи Мацубара жилд 30 сая иенээс (ойролцоогоор 203 мянган ам.доллар) дээш орлого үл хөдлөх хөрөнгө болон хөрөнгө оруулалтаас олдог. Гэсэн ч тэрээр нэгэн орон сууцны цэвэрлэгчээр ажиллахыг сонгожээ.
Түүний ажлын өдөр тун энгийн: долоо хоногт гурван удаа, өдөр бүр ердөө дөрвөн цаг ажиллаж, сардаа 100 мянган иен (680 ам.доллар) хөлс авдаг. Энэ нь Токио хотын дундаж цалингийн хажууд маш бага тоо хэдий ч Мацубарагийн хувьд ажлын орлогоос илүүтэй эрүүл мэнд, идэвхтэй амьдрал, сэтгэлийн тэнцвэр чухал.
Мацубара ганц бие ээжийн гэр бүлд өсч, залуудаа үйлдвэрт ажиллан хуримтлал үүсгэжээ. Хэдхэн сая иен (20 мянган ам.доллар орчим)-ийн хадгаламжаараа үл хөдлөх хөрөнгийн зах зээл доод түвшинд байсан үед жижиг байр худалдаж авсан нь өнөөгийн амжилтынх нь эхлэл болсон юм. Одоо тэрээр Токио болон түүний ойролцоох бүсэд долоон байр эзэмшдэг бөгөөд хувьцаа болон хөрөнгө оруулалтын сангуудад ч хөрөнгө оруулжээ.
Гэсэн ч Мацубара тансаг амьдралаас татгалзаж, өдөр тутамдаа энгийн хэв маягийг баримталдаг. Өөрөө хоолоо хийдэг, унадаг дугуйгаар зорчдог, энгийн гар утас хэрэглэдэг, бүр сүүлийн арван жилд шинэ хувцас аваагүй. Түүний хэлснээр:
“Би өдөр бүр хийх зүйлтэй байж, эрүүл мэндээ хамгаалж, өөрөө бодож сэтгэхийг хүсдэг.”
Түүний амьдралын түүх цахим ертөнцөд хурдан тарж, олон хүнээс магтаал хүлээжээ. “Жижүүр цэвэрлэгчээр ажилладаг ч саятан байж болдог” хэмээн түүнийг жишээ болгон бичицгээж байна. Коичи Мацубарагийн түүх Японд түгээмэл байдаг нэгэн үнэт зарчмыг илтгэнэ: хөрөнгөө чимээгүй арвижуулж, энгийнээр амьдарч, өдөр тутмын амьдралаас утга учир, аз жаргалыг олох.
эх сурвалж: Японы өдрийн сонин
Сэтгэгдэл бичих