2018 оны сүүлчээр шатахууны актон тоондоо хүрэхгүй байгаа тухай мэдээлэл цацагдаж, улмаар хуурамч шатахуун хэрэглээнд нэвтэрсэн гэх мэдээлэл цацагдсан. Уг мэдээлэлтэй холбогдуулан Ерөнхий сайд У.Хүрэлсүхийн захирамжаар ажлын хэсэг байгуулагдаж, шатахуун түгээх станцуудад шалгалт хийхээр болсон юм. Энэ талаар нийслэлийн Мэргэжлийн хяналтын газрын Эрчим хүч /газрын тос, хийн/ хяналтын улсын ахлах байцаагч Т.Мөнхболдоос энэ талаар тодрууллаа.
-Оны өмнө шатахуунтай холбоотой асуудлаар хамтарсан ажлын хэсэг байгуулагдсан. Энэ ажил юу болсон юм бэ?
-Ажлын хэсэг ажилдаа ороход бэлэн болсон. Ерөнхий газраас үүрэг өгөх ёстой. Үүний дараа шалгалт хийж эхэлнэ.
-Танай байгууллага үүнээс өмнө шалгалт хийх үү?
-Төлөвлөгөөт шалгалтыг жил бүрийн дөрөвдүгээр сард хийдэг. Энэ утгаараа ирэх дөрөвдүгээр сард хяналт, шалгалтын ажил хийгдэнэ.
-Оны өмнө шатахуун дутуу шахдаг, октаны тоо нь хэмжээндээ хүрэхгүй байна зэрэг асуудал гарсан. Уг асуудлаас хойш танай байгууллагад хэчнээн өргөдөл, гомдол ирэв?
-Иргэдээс шатахуун дутуу шахаж байгаа тухай цөөнгүй өргөдөл, гомдол ирсэн. Гомдлын дагуу манай байгууллагаас шалгалт хийхэд шатахуун дутуу шахсан нэг ч тохиолдол илрээгүй. Дараа нь асуудлыг баталгаажуулах зорилгоор хэвлэл мэдээллийн хэрэгсэлтэй хамтран Стандарчилал хэмжил зүйн газар явуулын төхөөрөмжөөр хяналт хийсэн. Үүгээр ч гэсэн илрээгүй. Эцсийн дүгнэлт нь түгээгчийн болгоомжгүй, хайхрамжгүй байдлаас үүдсэн байж болзошгүй. Тухайлбал, 100 мянган төгрөгт шатахуун худалдаж авлаа гэхэд 10 мянган төгрөг эсвэл 90 мянган төгрөг гээд хийчихдэг ч юм уу. Ийм тохиолдол гарсан байж магадгүй гэдэг дүгнэлтэд хүрсэн. Түүнээс биш ШТС-уудын түгээгүүр баталгаатай байсан. Зарим иргэд шатахуунаа дутуу шахаад байна хэмээн гомдол ирүүлдэг ч гомдлын дагуу шалгаад явъя гэхээр гомдлоо буцаачихдаг. Тиймээс бидний зүгээс иргэд автоашиныхаа эвдрэл, гэмтлийг давхар шалгаж байх хэрэгтэйг зөвлөх байна.
-Өнгөрсөн лхагва гаригт Хэнтий аймагт түлш тээвэрлэж явсан машин осолдож, түлш нь асгарсан осол гарсан. Асгарсан түлшийг бүрэн цэвэрлэж, байгаль орчинд учруулах хор хөнөөлөөс бүрэн сэргийлж чаддаг уу?
-Хөрсөндөө шингэсэн бол сөрөг нөлөөтэй. Гэхдээ үүнийг цэвэршүүлэх арга бий. Орон нутагт гарсан осол учраас хэдий хэмжээтэй асгарсан эсэхийг мэдэхгүй байна. Тухайлбал, ШТС-уудын тухайд ярихад тухайн хөрсөнд шингээхгүйн тулд талбайг хатуу хучилттай хийдэг юм. Мөн цементэн талбай дээр асгарсан шатахууныг цуглуулж, ослын савд авдаг технологитой байдаг. Тиймээс тухайн орон нутаг, байгаль орчны мэргэжилтэн, орон нутгийн Мэргэжлийн хяналтын газар зэрэг байгууллагууд шийдвэрээ гарган хөрсийг цэвэрлэх ёстой. Хөрсөн дээр шатахуун асгарсан үед гал гарах эрсдэлтэй үг шүү дээ. Шороог нь ухаж, хөрсөнд нь шинжилгээ хийж байж бүрэн цэвэрлэгдсэн эсэхийг нь мэднэ.
Сэтгэгдэл бичих