Ши Жиньпин Жо Байден нарын сүүлийн уулзалтаар Дональд Трампт тодорхой мессеж өгөв. Тэр нь БНХАУ танай найз байх хүсэлтэй, гэхдээ шаардлагатай бол тулалдахад бэлэн гэв
Перугийн Лима хотноо болсон APEC-ийн уулзалтын үеэр БНХАУ-ын Ерөнхийлөгч Ши Жиньпин ирэх нэгдүгээр сард Цагаан ордныг орхихоор байгаа Жо Байдентай уулзаж ярилцахдаа хоёр улсын хооронд шинэ хүйтэн дайн эхлэх ёсгүйг, мөн зөрчил мөргөлдөөнөөс зайлсхийх боломж байгааг тодотгожээ.
Гэхдээ дараа нь тэрбээр Дональд Трампын давж болохгүй дөрвөн улаан шугам БНХАУ-д байгааг анхааруулсан байна. Тодруулбал: Коммунист намын эрх мэдлийг сулруулах, БНХАУ-ыг ардчилсан засаглал руу шахах, эдийн засгийн өсөлтийг нь хяхаж хавчих, Тайванийн тусгаар тогтнолыг дэмжих гэсэн дөрвөн алхмаас Дональд Трамп зайлсхийх ёстой гэсэн дохио өгчээ.
Түүнчлэн Ши Жиньпин АНУ, БНХАУ урт хугацаанд энхтайвнаар зэрэгцэн оршихыг хичээх ёстой. Хүн төрөлхтөнд хүндрэл бэрхшээлийг даван туулахад туслахын тулд Эв санааны нэгдэл, хамтын ажиллагаа хэрэгтэй. Хамтын ажиллагааг салгах, нийлүүлэлтийн сүлжээг тасалдуулах нь зөв шийдэл биш гэж үзэж буйгаа илэрхийлсэн байна.
Харин Жо Байдены хувьд Хоёр талын харилцаанд ахиц дэвшил гарсанд талархаж байна гэж мэдэгджээ. Түүнчлэн Яриа хэлэлцээрийн үр дүнд хоёр улсын хооронд үл ойлголцол үүсэхээс сэргийлж, өрсөлдөөн нь зөрчилдөөн болж хувирахгүй байх баталгаа болж байна гэж тодотгосон байна. Мөн батлан хамгаалах, хиймэл оюуны эрсдэл, хар тамхины эсрэг хамтын ажиллагаа сайжирсныг дурджээ.
Үүнээс гадна Ши Жиньпин БНХАУ 2026 онд Ази, Номхон далайн эдийн засгийн хамтын ажиллагааны (APEC)-ийн дээд хэмжээний уулзалтыг зохион байгуулна гэж зарлалаа. Энэ нь БНХАУ APEC-ийн гишүүн улсуудтай хамтын ажиллагаагаа сайжруулахыг зорьж буй нэг алхам боллоо гэж ажиглагчид үзэж байна.
Хэдийгээр сүүлийн үед АНУ-БНХАУ-ын харилцаа тогтворжсон ч Дональд Трампын тарифын нөлөөгөөр хоёр улсын харилцаанд дахин саад учирч болзошгүй байгаа юм.
Энэ удаагийн уулзалтаар Ши Жиньпин АНУ-ын холбоотон улсуудтай хэлэлцэж, БНХАУ олон улсын худалдааны системийг хамгаалахыг зорьж байгааг харуулахыг хичээсэн гэхэд болохоор байна.
Эх сурвалж: https://www.bloombergtv.mn/
Сэтгэгдэл бичих