УИХ энэ сарын 8-нд Монгол Улсын 2025 оны төсвийн тухай хуулийн төслүүдийг баталсан билээ. Ингэхдээ төсвийн нийт орлогыг 33.8 их наяд, нийт зарлагын хэмжээг 35.7 их наяд, алдагдал 1.9 их наяд байхаар баталсан юм. Харин урсгал зардлыг 24.5 их наядаас бууруулах УИХ-ын гишүүдийн шаардлагын хүрээнд төсвийг ирэх оны нэгдүгээр улиралд багтаан тодотгох УИХ-ын тогтоолыг хамт баталсан.
Улмаар УИХ төсвийн төслүүдийг ёсчилж, Ерөнхийлөгчийн Тамгын газарт энэ долоо хоногт хүргүүлжээ. Тэгвэл Ерөнхийлөгч У.Хүрэлсүх 2025 оны төсвийн хуульд бүхэлд нь хориг тавьсан тухай мэдээлэл өчигдөр олон нийтийн сүлжээгээр цацагдсан. Гэвч энэхүү мэдээлэл нь албан ёсоор баталгаажаагүй бөгөөд Ерөнхийлөгч У.Хүрэлсүх төсвийн хуульд хориг тавьсан эсэх нь одоогоор тодорхой бус байгаа юм.
Энэ талаар Ерөнхийлөгчийн Тамгын газрын Хэвлэлийн албаны дарга Ө.Золбаяраас тодруулахад “Ерөнхийлөгч тав хоногийн хугацаанд төсөвт хориг тавих шийдвэрээ гаргах хуулийн хугацаатай. Төсөвт хориг тавих талаар шийдвэр хараахан гараагүй байна” гэжээ. Тэгвэл энэ асуултад өнөөдөр албан ёсоор хариулт өгөх бололтой. Тодруулбал, Ерөнхийлөгчийн Тамгын газраас Монгол Улсын 2025 оны төсвийн талаар өнөөдөр 11.00 цагт мэдээлэл өгөхөөр болсон байна.
Хуулийн дагуу Ерөнхийлөгч ажлын тав хоногийн дотор хориг тавих эсэх шийдвэр гаргах бөгөөд энэ хугацаа энэ сарын 22-нд дуусгавар болох юм.
Эх сурвалж: eagle.mn
Сэтгэгдэл бичих