Урин дулаан улирал наашилж, барилга бүтээн байгуулалтын ажил эхэлж байгаа энэ үед дотооддоо үйлдвэрлэдэг цементийн үнэ 30 орчим хувиар нэмэгдлээ. Өөрөөр хэлбэл, 210-250 мянган төгрөгийн үнэтэй байсан цемент 260-300 мянгад хүржээ. Ийнхүү цементийн үнэ нэмэгдсэн явдалд Засгийн газар анхаарал хандуулж үүнд хяналт шалгалт хийж мэдээлэх үүргийг Шадар сайд холбогдох яам, ШӨХТГ-т өгчээ. Уг шалгалтын багынхан үр дүнгээ танилцуулсан байна. Үүнд ‘Манай улс нийт 1.8 сая тонн цемент хэрэглэдэг. Энэхүү хэрэгцээг цементийн дотоодын дөрвөн үйлдвэр бүрэн хангаж байна. Эдгээр үйлдвэр бүтээгдэхүүний үнээ өнгөрсөн долоо хоногт 18-26 хувиар өсгөсөн юм. Ингэж өсөхөд цементийн үйлдвэрийн зардал нэмэгдсэнтэй холбоотой. Өөрөөр хэлбэл гөлтгөнө 30 хувиар, ажиллах хүчний зардал 15 хувиар, үнс, нүүрс, шохойн чулуу зэрэг бусад түүхий эдийн үнэ 25 хувиар өссөн’ гэлээ.
Өмнө нь 2020 онд цементийн үнэ дээр 20 хувийн өсөлт гарч байлаа. Тухайн үед цементийн үнийг хий хөөрөгдөж байна уу эсвэл зайлшгүй шаардлагын улмаас нэмсэн үү гэх хариултыг хайн шалгалт явуулж байв. Шалгалтаар худалдаачид хий хөөрөгдөж үнэ нэмж буйг илрүүлсэн юм. Харин энэ удаагийн өсөлт үнийг хэт барьснаас үйлдвэрлэгчид алдагдалтай ажиллаж эхэлсэнтэй холбоотой аж. Иймд цемент үйлдвэрлэгчид хэдий хэр хугацаанд ямар алдагдалтай ажилласныг тодрууллаа. Цемент үйлдвэрлэгч ‘2014 оноос хойш цементийн үнээ нэмээгүй. Гэтэл бусад бүх материалын үнийг нэмсэн. Цахилгааны үнэ, тээврийн хөлс, нүүрс, гаднаас авдаг цемент хийх төмөр бүгд дээрх хугацаанд өссөн бол цементийн үнэ өсөөгүй. Учир нь төрөөс зөвхөн цементийн үнийг өсгөж болохгүй гэсэн хязгаар тогтоож үнийг барьсантай холбоотой. Нөгөөтээгүүр барилгын гол түүхий эд болох арматурын үнэ хэд дахин өссөн. Арматур барилгын зардлын 24 хувийг эзэлдэг бол цемент 16 хувийг эзэлдэг’ гэлээ.
Засгийн газраас цементийн үнийг тогтмол барьсаар ирсэн. Энэ нь орон сууцны үнийг нэмэгдүүлэхгүй, инфляцыг өдөөх хөшүүрэг болгохгүй, иргэдийн худалдан авах чадварт нөлөөлөхгүй байлгах гэсэн хэд хэдэн шалтгаантай. Гэвч сүүлийн жилүүдэд хил гаалийн хязгаарлалтаас хамааран цемент үйлдвэрлэхэд шаардлагатай түүхий эдийн үнэ нэмэгджээ. Энэ нь цемент үйлдвэрлэгчдийн нуруунд ачаа болж байв.
Цементийн үнэ нэмэгдсэнээр үйлдвэрлэгчдийн алдагдал арилах ч эдийн засгийн өсөлт, иргэдийн амьдралд дарамт болох юм. Тэгвэл энэхүү дарамтыг бүдүүн зургаар нь авч үзье. Барилгын зардлын 16 хувийг эзэлдэг цементийн үнэ 30-40 хувь нэмэгдэхээр шинээр баригдах барилгын үнэ 4.8 хувиар өсөх тооцоо гарса байна. Энэ нь орон сууцны үнэд нөлөөлж улмаар таван хувиар нэмэгдэх дүр зураг харагдаж байгаа юм. Энэ нь цаашлаад инфляц нэмэгдэх хөшүүрэг болохыг эдийн засагчид анхааруулсан юм. Өөрөөр хэлбэл цементийн үнийн өсөлтөөс шалтгаалж инфляц хяналтаас гарах нөхцөл үүссэнийг эдийн засагчид анхааруулж байна.
Сэтгэгдэл бичих