Д.Дэмбэрэл: М.Энхболд та хуулиас гадна бичигдээгүй ёс зүйн хууль гэж байдгийг мэдэж, баримтлах хэрэгтэй

МАН-ын 28-р их хурлын III бага хурал үргэлжилж байна.

Энэ үеэр Бага хурлын гишүүд нээлттэй үзэл бодлоо илэрхийлсээр байгаа аж. Гишүүдийн хэлсэн үгнээс хүргэж байна.

Д.ОЮУНХОРОЛ: АРД ТҮМЭН МАНАЙ НАМЫГ ХҮНДЭТГЭДЭГ УЧРААС СОНГОСОН ЮМ

УИХ-ын гишүүн Д.Оюунхорол “2012 онд Ардчилсан нам олонхоороо сонгогдон хариуцлагагүй ажилласны дүнд ард түмэн муу дүн тавихын зэрэгцээ улс төрийн ууган хүчин МАН-ын туршлагад найдан сонголтоо хийсэн. Ард түмэн манай намыг хүндэтгэдэг учраас сонгосон юм. Бид АН-ын засаг барьсан цаг үед нэгдэж ялалт байгуулж чадсан. Нэг голын уснаас ундаалж явсан залуу цагийн найзууд М.Энхболд, У.Хүрэлсүх та хоёр намын даргын тамгаа солилцохдоо МАН-ын 100 жилийн ойгоор ялалт байгуулна гэж тэврэлдсэн шиг өнөөдрийн хурлын дараа ч бас ойлголцож тэврэлдээсэй гэж хүсч байна” гэжээ.

Д.ДЭМБЭРЭЛ: НАМЫН ДАРГА У.ХҮРЭЛСҮХИЙН НАМАА ЦЭВЭРЛЭХ ШААРДЛАГЫГ ДЭМЖИЖ БАЙНА

Мөн УИХ-ын дарга асан Д.Дэмбэрэл “Намын дарга У.Хүрэлсүхийн намаа цэвэрлэх шаардлагыг дэмжиж байна. Та энэ цаг үед улс орноо удирдаж авч явж чадахаа харуулах хэрэгтэй. УИХ-ын дарга М.Энхболд та хуулиас гадна бичигдээгүй ёс зүйн хууль гэж байдгийг мэдэж, баримтлах хэрэгтэй. Үүн дээр намын бага хурлын гишүүд та бүхэн үгээ нээлттэй илэрхийлэх эрхтэй” хэмээн хэлсэн байна.