Төрийн өмчийн бодлого зохицуулалтын газрын дарга Б.Цэнгэл, Захиргаа удирдлагын хэлтсийн дарга Н.Ганболд нарын албаны хүмүүс өнөөдөр “Зүүнбаян төмөр зам” ХХК-ийн үйл ажиллагаатай танилцлаа. Тус компани нь Засгийн газрын 2020 оны 117-р тогтоолоор байгуулагдаж, Тавантолгой-Зүүнбаян чиглэлийн 416,1 км төмөр замын суурь бүтэц барих, эзэмших, ашиглах, тээврийн үйл ажиллагаанд оролцох зорилгоор үндсэн үйл ажиллагаагаа явуулж байна.
Өнөөдрийн байдлаар тус компани бүтэц, зохион байгуулалтын хувьд таван хэлтэс, хоёр алба, 40 гаруй ажилтантайгаар үйл ажиллагаа явуулж байна.
“Зүүнбаян төмөр зам” ХХК-ийн удирдлагын баг ажилтнуудынхаа сургалтын хэрэгцээ шаардлагыг үндэслэж, тэднийг мэргэжил ур чадвараа дээшлүүлэх боломжоор байнга ханган ажилладаг. Тун удахгүй “Тавантолгой-Зүүнбаян” чиглэлийн төмөр замын бүтээн байгуулалт дуусах гэж байгаатай холбоотойгоор хүний нөөцийн бүрдүүлэлтэд ч бас анхааран ажиллаж байгаа талаараа компанийн төлөөлөл ТӨБЗГ-ын албаны хүмүүст мэдээлэл өглөө.
Энэ үеэр ТӨБЗГ-ын дарга Б.Цэнгэл Зам, тээврийн хөгжлийн яамнаас БНСУ-ын “Soosung Engineering” консерциумтай хамтран зохион байгуулсан “Монгол Улсын төмөр замын салбарын чадавхыг бэхжүүлэх” сургалтад хамрагдсан инженер, техникийн болон удирдах албан тушаалтнуудад батламж гардуулан өгч, төмөр замчин залууст ажлын өндөр амжилт хүслээ.
Сэтгэгдэл бичих