Нийслэл, дүүргийн Засаг даргын 2021-2024 оны үйл ажиллагааны хөтөлбөрийн хүрээнд СХД-ийн 43 хороо бүрт бүтээн байгуулалтын ажлууд өрнөж буй юм. Тэдгээрийн нэг болох 25-р хороонд энэ онд Улс, Нийслэл, Орон нутгийн төсвөөр хийгдэж байгаа хэд, хэдэн бүтээн байгуулалтын ажлуудыг танилцуулж байна.
1. 2021 онд Нийслэлийн хөрөнгө оруулалтаар “Ахмад настан, хөгжлийн бэрхшээлтэй иргэдэд зориулсан нийтийн биеийн тамир, амралт соёл үйлчилгээний төв”-ийн барилгын гүйцэтгэлийн ажил эхэлж, одоогийн байдлаар суурийн нүхийг ухан, блок өрөлтийн ажил эхлээд байна. Нэг давхар энэ байгууламж нь ахмад настнууд болон хөгжлийн бэрхшээлтэй иргэдийн чөлөөт цагаа үр дүнтэй өнгөрүүлэх газар болох юм. Энэ онд ашиглалтад оруулахаар барилгын ажил хэвийн явагдаж байна.
2. 2020 онд Азийн хөгжлийн банкны хөрөнгө оруулалтаар 110 хүүхдийн багтаамжтай 2 давхар эко цэцэрлэгийн барилгын ажлыг эхлүүлэн одоогийн байдлаар 55 хувийн гүйцэтгэлтэй явагдаж байна. Тус цэцэрлэг нь дээвэр дээрээ эко орчинг бүрдүүлсэн мини цэцэрлэгт хүрээлэнтэй хоёр давхар байгууламж болох юм. Энэ оны арванхоёрдугаар сард ашиглалтад орохоор барилгын ажил үргэлжилж байна.
3. 2020 онд Нийслэлийн хөрөнгө оруулалтаар Зүүн салааны төв замаас 170 дугаар цэцэрлэг хүртэл 800 метр хатуу хучилттай авто зам, хоёр талын гэрэлтүүлгийн хамтаар бүрэн хийгдсэн бөгөөд зарим иргэдийн газар чөлөөлөлтөөс шалтгаалан явган хүний зам барих үйл явц 40 хувьтай явагдаж байна. Энэ онд онд явган хүний замыг бүрэн шинэчлэн дуусгахаар төлөвлөсөн.
4. 2021 онд иргэдээс ирсэн санал хүсэлтийн дагуу дүүргийн Тамгын газар, дүүргийн ИТХ, хорооны хөрөнгө оруулалтаар Хайрханы 1, 2, 6 дугаар гудамжинд үерийн шуудуу ухаж, шороон далан босгон, дүүргийн ИТХ-ын төлөөлөгч, хорооны хөрөнгө оруулалтаар Хайрхан 1, 6 дугаар гудамжинд оршин суугаа иргэдийн оролцоотойгоор бага оврын автомашин болон явган хүн гарах 4 ширхэг цементэн хавтан бүхий гүүрэн 2 гарцыг суурилуулсан.
5. Энэ оны 7, 8 дугаар сард Австрийн хөрөнгө оруулалтаар Одонт 3, Одонт 5, Одонт 7-11, Одонт 10-11, Одонт 15-21, Хайрхан 2 /наагуур/, 3, 4, Улсын хөрөнгө оруулалтаар Одонт 2, Одонт 4, Одонт 21, Хайрхан 2 /Төв зам талдаа/, Хайрхан 6, Нийслэлийн хөрөнгө оруулалтаар Хайрхан 1 /урд талын мухар гудамж/, Хайрхан 2 /Хайрхан 2 гудамж 179-188/, Хайрхан 7, Одонт 5 /жалганы урд тал/, Одонт 6 /дээд хэсэг/, Одонт 17, Одонт 20 гудамжинд нийт 420 ширхэг гэрэлтүүлэг хийлгэхээр төлөвлөөд байна. Дээрх гэрэлтүүлгийн хөрөнгө оруулалт амжилттай хэрэгжвэл тус хорооны 37 гудамжны 90 хувь нь гэрэлтүүлэгтэй болох юм.
Сэтгэгдэл бичих