Цаг уур орчны шинжилгээний газраас ойрын өдрүүдэд ихэнх нутгаар үргэлжилсэн бороо орж, байгалийн гамшигт үзэгдэл үүсэж болзошгүйг анхааруулсаар байгаа билээ. Тиймээс дүүргийн Онцгой комиссын Үер, ус байгалийн аюулт үзэгдэлтэй тэмцэх ажлын хэсэг өнөөдөр /2021.06.14/ хуралдлаа.
Хурлын үеэр ажлын хэсгийн бүрэлдэхүүнд бүх хороодод байгалийн гамшигт үзэгдлээс урьдчилан сэргийлэх сэрэмжлүүлэг мэдээлэл хүргэх, Үерийн аман дээр буусан айл өрх, аж ахуйн нэгж, байгууллагын судалгааг нарийвчлан гаргах, Дүүргийн гамшгаас хамгаалах албад, мэргэжлийн ангийн хүн хүч, техник хэрэгслийн бэлтгэл байдлыг хангах, Болзошгүй үерийн үед ариутгал халдваргүйжүүлэлт хийх ажлыг шуурхай зохион байгуулж ажиллахыг үүрэг болголоо.
Ажлын хэсгийнхэн өнөөдрөөс хамтарсан багийн бүрэлдэхүүнийг тодорхойлж, 24 цагийн турш иргэдийг урьдчилан сэргийлэх мэдээллээр хангах, эргүүлийн үүрэг гүйцэтгэж, эрсдэл үүссэн нөхцөлд ашиглах техник хэрэгсэл, тоног төхөөрөмжийн бэлэн байдлыг хангахаар боллоо.
Мөн ажлын хэсгийн бүрэлдэхүүн эрсдэлтэй хороодын үерийн далан, суваг, нуур, цөөрөм бүхий хэсгүүдэд анхааруулах тууз, мэдээллийн самбарыг байршуулж, бага насны хүүхдүүдийг хараа хяналтгүй, үер, усны хамгаалалтын байгууламжуудын ойролцоо тоглуулахгүй байх зэрэгт хороодын Засаг дарга нартай хамтран урьдчилан сэргийлж ажиллахаар тогтов.
Сэтгэгдэл бичих