УОК-ын Шуурхай ажлын хэсэг хуралдаж зарим асуудлыг хэлэлцэн шийдэрлэжээ. Үүнтэй холбогдуулан УОК-оос мэдээлэл хийлээ. Тус комиссын нарийн бичгийн дарга Т.Баярхүү “Одоогийн байдлаар 18 салбар чиглэлийн үйл ажиллагааг хязгаарласан байгаа. Эрсдэлийн үнэлгээ хийж эдгээрээс зарим үйл ажиллагааг нээхээр боллоо. Маргааш буюу тавдугаар сарын 15-наас кофе шоп танхимынхаа 50 хувьд халдвар хамгааллын дэглэмийг баримтлан ажиллана. Мөн бүх төрлийн сургалтын танхимууд 10 хүртэл хүнтэйгээр үйл ажиллагаагаа явуулж болно. Гуравдугаарт чийрэгжүүлж, бялдаржуулах төвүүд ажиллана. Дөрөвдүгээрт усан бассейн 50 хувийн дүүргэлттэйгээр ажиллаж эхэлнэ. Үйл ажиллагааг нь нээж буй дөрвөн төрлийн үйлчилгээний байгууллагаар зөвхөн вакцины хоёр дахь тунгаа хийлгээд 14 хоносон, өвчлөөд эдгэрсэн хүмүүс үйлчлүүлнэ.
Мөн энэ сарын 22-ноос орон нутаг хоорондын зорчих хөдөлгөөнийг нээхээс гадна томоохон зах худалдааны төвүүд, хоол үйлдвэрлэл, үйлчилгээ, зочид буудал, амралт жуулчын бааз гэх мэт чиглэлүүдийн үйл ажиллагааг нээхээр төлөвлөж байна. Гэхдээ энэ бол баталчихсан шийдвэр биш. Тухайн үед нь эрсдэлээ үнэлээд шийдвэрээ гаргана” гэлээ.
Сэтгэгдэл бичих