С.Эрдэнийн, Тувааны хоёр нам М.Тулгат, О.Цогтгэрэл гэсэн хоёр даргатай болж, энэ хоёр даргын дунд жирийн иргэд байтугай АН-ын гишүүдийн толгой эргэж байна. С.Эрдэнийн намын даргаар цахим сонгуулиар тодорсон М.Тулгатыг Зи.Энхболдын хүн гэлцдэг. АН-даа нэр хүндтэй, өнгөрсөн УИХ-ын сонгуулиар намдаа тэрбум төгрөг хандивлачихаад тойроггүй хоцорлоо гэж шүүд зууж явсан нөхөр.
Мөн Ардчилсан намын хоёр даргын нэг О.Цогтгэрэлийг “Зайрмагны хаан” гэдэг. Монголын зайрмагны 50 шахам хувийг дангаараа хангадаг. ТЭСО корпораци нь хүнсний үйлдвэрлэлийн салбарт анх 2003 онд “Бамбар” нэртэй зайрмагийг үйлдвэрлэн үйл ажиллагаагаа эхлүүлсэн бол өнөөдөр амттан үйлдвэрлэлийн “Айсмарк” ХХК, будаа, гоймонгийн үйлдвэрлэлийн “Агь” ХХК, шингэн хүнс, сүү үйлдвэрлэлийн “Милко” ХХК гэсэн 3 салбар компани, 8 хүнсний үйлдвэртэй болж үйл ажиллагаа нь өргөжжээ. 2012 онд АН ялан, Увсын гаралтай Н.Алтанхуяг Ерөнхий сайд болохтой зэрэгцэн “Тэсо”-гийн Цогтгэрэлийн бизнес өргөжсөн гэдэг. Тухайлбал, 2012 онд нийслэлийн Сонгинохайрхан дүүрэгт 3520 айлын “Содон” стандарт цогцолборт хорооллыг барьсан. Энэ үеэс уул уурхай, гадаад худалдаа тээвэр зуучийн салбарт орж, бетон зуурмагийн үйлдвэр байгуулжээ.
Тэсо корпораци нь 6,5 сая ам.доллартай тэнцэх төгрөгийн санхүүжилтийн гэрээг Европын сэргээн босголт хөгжлийн банктай байгуулсан. Айсмарк ХХК, Агь ХХК-ийн өргөжилт, шинэ төслүүддээ хөрөнгө оруулалт авсан байна.
Мөн 2019 оны сүүлчээр ТЭСО Корпораци Азийн хөгжлийн банкнаас 20 тэрбум төгрөгийн, урт хугацаатай, хүүгийн таатай нөхцөлтэй, хөрөнгө оруулалтын зээл авсан. Энэ нь Азийн хөгжлийн банк Монголд анх удаагаа төгрөгөөр зээл олгосон юм.
УИХ-ын гишүүн Одонгийн Цогтгэрэлийн ард ерөнхийлөгч Х.Баттулга байгаа гэдэг ч бие даагч Н.Алтанхуяг байх илүү магадлалтай. О.Цогтгэрэл намын дарга болоод Н.Алтанхуягийн гишүүнчлэлийг сэргээх, цаашилбал Ерөнхийлөгчийн сонгуульд нэр дэвшүүлэх нууц даалгавартай гэж хардаж байна.
Эх сурвалж: ulstur.com
Сэтгэгдэл бичих