Газрын тосны үнэ мягмар гарагт дахиад уналаа. Brent 2018 онд олж авсан өсөлтөө эргүүлэн алдаж, хөрөнгө оруулагчдын дунд газрын тосны нийлүүлэлт хэрээс хэтрэх нь гэсэн айдас үүсэв. Газрын тосны олон улсын бенчмарк Brent-ийн үнэ сүүлийн 11 сард тохиолдоогүйгээр унаж, баррел нь 7.6 хувь буюу 5.08 ам.доллараар бууран 61.71 ам.доллар болов.
АНУ-ын бенчмарк West Texas Intermeditate долоон хувь буюу 3.99 ам.доллараар бууж, баррел нь 52.77 ам.доллар хүртэл уналаа. WTI-ийн үнэ 2017 оны аравдугаар сараас хойш ингэж суларч байгаагүй юм. Газрын тосны үйлдвэрлэлээр тэргүүлдэг Саудын Араб зэрэг улс олборлолтоо өсгөхөөр амласан нь хөрөнгө оруулагчдыг түгшээж эхэллээ.
Тус улсыг АНУ-ын Ерөнхийлөгч Дональд Трамп “тууштай түнш” хэмээн мягмар гарагт үнэлсэн нь уг түгшүүрийг улам нэмсэн юм. Д.Трампын үнэлгээ нь АНУ-д амьдардаг сэтгүүлч Жамал Хашоггийн үхэлд Саудын Арабын угсаа залгамжлах хунтайж, де факто удирдагч Мохаммед бин Салманыг холбоотой хэмээн сэжиглэж буй үед гарч байна.
“Саудын Араб бидэнтэй нягт хамтран ажиллаж, газрын тосны үнийг зохистой түвшинд бариулах тухай хүсэлтэд минь шуурхай хариу өглөө. Дэлхий ертөнцөд энэ л чухал” хэмээн ноён Трамп мэдэгдлээ.
Ерөнхийлөгч үүнийхээ дараахан нь Цагаан ордны гадна сэтгүүлчдэд хандан Саудын Араб дэлхийн газрын тосны үйлдвэрлэлд чухал үүрэгтэйг онцлон дурдсан юм.
“Бид энэ улстай эвдрэлцвэл газрын тосны үнэ л талийна” хэмээн тэрбээр анхааруулж байв.
“Би үнийг нь буулгасан. Үнэ буулгахад Саудын Араб тус боллоо. Яг одоо газрын тосны үнэ харьцангуй хямд боллоо. Цаашид улам буугаасай гэх байна” гэсэн юм.
Газрын тосны үнийг унагах шинэ шахалт болж буй Ерөнхийлөгчийн уг мэдэгдэлтэй зэрэгцэн үнэт цаасны зах зээлд технологийн компаниудын хувьцааны үнэ ч эрс унав.
АНУ энэ сарын эхээр Тегераны эсрэг хоригоо сэргээхдээ ираны газрын тосны гол худалдан авагчдыг хоригоос чөлөөлсөн нь газрын тосны үнэ буурахад нэрмээс болсон юм. Аравдугаар сард сүүлийн дөрвөн жилийн үнэмлэхүй түвшинд хүрч баррел нь 86 ам.доллар болсон Brent-ийн үнэ эргээд 28 хувиар унаад байна.
Дэлхийн эдийн засгийн өсөлт удааширч газрын тосны эрэлт саарсан цаг үед АНУ-ын занарын тос олборлолт ч эрчтэй ихэссээр. ОПЕК-ийн гишүүд, ОХУ зэрэг тус картелийн гишүүн бус олборлогч улсуудын газрын тосны сайд нар ирэх сард бодлого тодорхойлохоор хуралдана.
Уг хуралдаанаар олборлолтыг өдөрт дор хаяж нэг сая баррелиар багасгах асуудлыг мөн хэлэлцэх юм.
Сэтгэгдэл бичих