Монгол Улс 2009 оноос хөрш орнууд болох БНХАУ-ын ӨМӨЗО, ОХУ-ын Буриад улстай хамтран хүүхэд залуусын дунд олон улсын хүүхдийн спортын наадмыг зохион байгуулж эхэлжээ. Энэ уламжлалын дагуу 2021 онд 10 дугаар наадам Улаанбаатар хотноо зохион байгуулагдахаар товлогдсон ч дэлхий нийтийг хамарсан цар тахлын улмаас ирэх 2022 оныг хүртэл хойшлоод байна.
Үүнтэй холбогдуулан олон улсын хүүхийн спортын X наадмыг зохион байгуулах ажлын хэсгийн цахим уулзалт хийжээ.
Уулзалтад Биеийн тамир, спортын улсын хорооны Спортын бодлогын хэрэгжилтийн хэлтсийн дарга О.Баттулга, Гадаад харилцаа, мэдээллийн технологийн хэлтсийн дарга Н.Оюунбат, БНХАУ-ын ӨМӨЗО-ны Биеийн тамир, спортын хорооны Дасгал сургуулилтын газрын дарга Цай Шиао, Залуучуудын хэлтсийн дарга Ши Шиаопин, Холбооны Буриадын парламентын гишүүдийн хорооны дарга Дашибальжирова, Спортын яамны газрын дарга Алексей Федерович, яамны ахлах мэргэжилтэн Илья, мэргэжилтэн Саяана нар оролцсон байна. Уулзалтаар хүүхдийн спортын наадмын төрлийг нэмэгдүүлж байт харваа, бокс, волейбол, жүдо, теннис, чөлөөт бөх, ширээний теннис, сагсан бөмбөг, Хөлбөмбөг, хөнгөн атлетик, шатар нийт 11 төрлөөр зохион байгуулахаар ярилцжээ.
Сэтгэгдэл бичих