Оюутолгой төсөл Монгол Улсад илүү их үр өгөөжтэй байлгахын тулд Засгийн газраас өмнө байгаагүй томоохон ажлын хэсэг гаргасан хэмээн одоогийн Ерөнхий сайд Л.Оюун-Эрдэнэ хэлж байсан.
Тус Ажлын хэсэг өчигдөр (2021.02.03) “Рио Тинто” компанийн төлөөлөлтэй цахим уулзалт зохион байгуулав. Уулзалтад “Рио Тинто”-г төлөөлж, тус компанийн Зэсийн группийн Гүйцэтгэх захирал Б.Болд, “Рио Тинто Монгол” компанийн Гүйцэтгэх захирлаар ажиллаж байсан С.Мөнхсүх, “Рио Тинто Монгол” компанийн Дэд захирал Х.Амаржаргал нар оролцсон байна.
Ерөнхий сайд Л.Оюун-Эрдэнэ Засгийн газраас “Оюутолгой”-н Хөрөнгө оруулалтын гэрээнд өөрчлөлт оруулах, “Дубайн гэрээ”-г цуцлах, шинээр байгуулах талаар “Рио Тинто” компанид санал тавьсан тухай мэдэгдсэн. Тэрбээр танхимын бүрэлдэхүүнээ танилцуулахдаа “Уул уурхайн стратегийн орд газруудын шууд өгөөжийг сайжруулна. “Оюутолгой”-н гэрээг эрс сайжруулж, Монгол Улс баялгаа ашиглуулсны хариуд өртэй биш, харин өвтэй үлдэх нөхцлийг бүрдүүлэхийн төлөө УИХ-тай нягт хамтран ажиллана” хэмээн онцолсон билээ.
Эх сурвалжийн мэдээлж буйгаар, Ерөнхий сайдын өгсөн чиглэлийн дагуу “Оюутолгой”-н асуудлаар Монголын талаас АНУ-ын Нью-Йорк мужийн Дээд шүүхэд гаргасан нэхэмжлэлийн шаардлагыг хэвээр хадгалж, шүүхийн үйл явцыг сэргээх хүсэлтийг “Кинг энд спалдинг” хуулийн фирм рүү явуулжээ.
Засгийн газрын ажлын хэсгийг Хууль зүй, дотоод хэргийн сайд Х.Нямбаатар ахалж ажиллаж эхэлсэн бөгөөд өчигдөр хөрөнгө оруулагч талтай хурал хийжээ.
Хууль зүй, дотоод хэргийн сайд “Рио-Тинто” группийн Зэсийн группийн гүйцэтгэх захирал Б.Болдтой өнөөдөр анхныхаа цахим хурлыг хийлээ. Бид бүгд нэг завин дээр байгаа гэдгийг тэрээр онцолж байна. Анхны хурал амжилттай” хэмээн цахим хуудсандаа бичсэн байна.
Сэтгэгдэл бичих