‘Hero энтертайнмент студийн захирал, найруулагч Б.Баатар нэг УИХ-ын гишүүн П.Анужинтай хэвлэлээр нэр холбогдож явсан. Олны яриаг батлах мэт найруулагч Б.Баатар долоон жил үерхэж байж гэр бүлийн амьдралаа зохиосон жүжигчин Ч.Ундралаас салж тус тусын амьдралаа шинэр эхлүүлсэн. Жүжигчин Ч.Ундрал хэвлэлд өгсөн ярилцлагадаа ‘Аль эрт өөр эмэгтэйд сэтгэл алдарсан эр нөхрийнхөө араас тэгтлээ чаргууцалдахыг хүсээгүй’ гэж ярьсан байдаг.
Мөн одоог хүртэл нөхрөө хайрлаж явдгаа нуугаагүй тэрбээр ‘Херо’ энтертайнмент студийг анхлан хөл дээр нь босголцсон шигээ өөрийнхөө шинэ бизнесийг эхлүүлж буйгаа дэлгэсэн байна. Тэрбээр салсан нөхрөөсөө мөнгө төгрөг нэхэмжилж, бизнесээ булаацалдах хүсэлгүй байгаа төдийгүй хүүдээ маш сайн аав байж чаддаг Б.Баатарт бурууг тохоогүй аж.
Харин найруулагч залуу өөрийн өгсөн ярилцлагадаа ‘Анужин бид хоёрын дунд ажил хэргийн харилцаанаас өөр асуудал байхгүй. Харин энэ яриаг гарахаас өмнө Ундрал бид хоёрын харилцаанд өөрчлөлт орчихсон байсан. Эхнэр маань бие даасан, эрх чөлөөт амьдралыг илүүд үзсэн учраас өөрийн сонголтоо хийсэн’ хэмээх тун сонин тайлбарыг өгчээ. Түүнээс сэтгүүлч ‘Залуу хосууд эхний сорилтуудаа даахгүй салцгаах нь түгээмэл. Гэтэл жүжигчин Ундрал та хоёр харьцангуй удаан хамт амьдарсан. Яагаад салсан бэ. Ямар нэгэн дүр хөндлөнгөөс гарч ирснээс болсон уу’ хэмээн асуухад ‘Тэрнээс болсон гэж би амьдралыг бодох дургүй. Зүгээр л ийм байх ёстой байж дээ гэж. Аль алинтай нь энэ хорвоод учирсандаа баяртай байдаг. Ундралтай хамт байсан он жилүүд миний хувьд хамгийн аз жаргалтай цаг хугацаа мөн. Би Ундралд одоо хүртэл хайртай. Хайрыг чинь аваад явчихаж болдоггүй. Би Анудаа ч хайртай. Надтай учирсан бүх л эмэгтэй хүнд хайртай. Тэр нь сайн яваасай гэдэг л хайр. Хайр гэдэг хамт амьдрахдаа оршдог юм биш. Үргэлж сайн санахыг, дотроо өмгөөлж хамгаалж явахыг хайр гэнэ. Би тухайн үед намайг шударга бусаар буруутгаж байхад нь ч дараа нь ойлгох мөн чанарын тухай боддог. Миний багш ч гэсэн заадаг байсан. Миний ах ч гэсэн хэлдэг байсан. Өнөөдөр нүгэл юм шиг харагддаг буян гэж байдаг. Өнөөдөр буян гэж харагддаг нүгэл байдаг гэдэг. Энэ бол агуу үг. Би мөн чанар нь үнэн гэсэн зүйл дээр л өөрийн тэр бүр гаргаад үзүүлж чаддаггүй энэ зүрхээ бооцоонд тавьж явдаг. Түүнээс биш нийгмийн сэтгэлзүйг дагавал бид зүгээр л хамхуул болно шүү дээ’ гэсэн хариултыг өгчээ.
Эх сурвалж: Eyreg.com
Сэтгэгдэл бичих