Нялх биетэй бүсгүйг өвлийн хүйтэнд төрөх эмнэлгээс халад, таавчигтай нь авч гарч ХӨСҮТ рүү шилжүүлсэн эрүүл мэндийн салбарынхны алдаа иргэдийн бухимдлыг төрүүлсэн. Харин иргэдийн энэ бухимдлыг ирэх хаврын сонгуулийг тооцоолон, онилж суугаа улс төрийн намууд, ашиг сонирхлын бүлгүүд өөртөө ашиглах гэж оролдлоо. Үнэн ба зөв намын дарга А.Отгонбаатар, Зон олны намын дарга Э.Одбаяр нарын өчигдөр Д.Сүхбаатарын талбайд илэрхийлсэн эсэргүүцлийн сургаар иргэд цугларч, хариуцлага алдсан УОК, Эрүүл мэндийн сайд нарыг огцрохыг шаардсан нь цуглааны дөнгөж эхлэл байв.
Үд дундаас эхлээд жагсаалыг зорьж байгаа хүмүүсийн тоо өссөн нь УИХ дахь АН-ын бүлгийн ‘битон’ Д.Ганбат, Ц.Туваан, Д.Адьяасүрэн нартай холбоотой болов. АН одоогийн байдлаар тамга, тэмдэгээ хураалгасан, намын даргын үүрэг гүйцэтгэгч Ц.Туваан шүүхэд нэмж материал хүргүүлэх шаардлагыг хэрхэн шийдэх вэ гэдэг дээр толгойгоо гашилгаж суугаа. УИХ-ын сонгуулиас хойш зөрчил нь дийлдэхээ больсон АН С.Эрдэнэ ба Ц.Туваан гэсэн хоёр бүлэгт хуваагдан тоншилцож байгаа. Ц.Туваанд эрх мэдэл, бие даасан шийдэл бол байхгүй. Тэр зөвхөн Ерөнхийлөгч Х.Баттулгын утсан хүүхэлдэй гэдгийг ч намынхан нь аль хэдийнээ зарласан билээ.
АН-ынхны дүгнэлтээр Ерөнхийлөгчийн дохиураар хөдөлгөөнд ордог Ц.Туваан өчигдөр УИХ дахь яг Х.Баттулгын хүмүүс болох Баянхонгороос парламентад сонгогдсон Д.Ганбат, Д.Адьяасүрэн нарт хөтлүүлэн жагсагчдад хүч нэмэхээр ирж, АН дотоод зодооноо гудамжинд чирээд гаргаад ирж байна гэдгээ зарлаж орхив. Тэднийг ирснээр иргэдийн тайван жагсаал утгаа алдаж, олон нийтийн сүлжээнийхэн ‘битон’ Д.Ганбат, Ц.Туваан, Д.Адьяасүрэн нарыг ‘Жагсаал аллаа’ хэмээн шүүмжилж байлаа. АН бол мэргэжлийн жагсагчидтай, бараг армитай гэж хэлж болохоор улс төрийн нам гэдгээ ч энэ жагсаалаар нотлов. Тэднийг жагсаал дээр ирснээс хойш хүний тоо ихэсч, хэн нь хэн бэ гэдгээ хэдийнээ мэдэх болсон жиргээчид Мояачууд, МоАХ-ынхан бөөнөөрөө орж ирлээ.
Жагсаалд өөрсдөө хүслээрээ ирсэн хүмүүс байсан ч зохион байгуулалттай, өөр зорилготой ирсэн хүмүүсээр дүүрч байна. Бидэнд танил технологи, бидний туулсан зам” харагдаж байна хэмээн жиргэж байв. С.Эрдэнэд уураа гаргаж чадахгүй явсан Ц.Туваан тэргүүтэн С.Эрдэнийн хүүгийн эхлүүлсэн жагсаалыг эзэгнэж, эцэгтэй нь ч, АН-тай ч ноцолдох шанг завшааныг ашиглан эхлүүлэв. Жагсаалын дундуур халуун хоол зөөж, бэлэн тавчиг, халад авахыг санал болгосон хүмүүс гүйлдэж байсан нь эрүүл мэндийн салбарын ажилчдын алдаа, хөөрхий бүсгүйн өвчин зовлонгоор улс төр хийж зорилго агуулагдсан байгааг харж болох болох. Орой 20.00 цаг орчимд жагсаал халамцуу хүмүүсээр дүүрч, халамцуу хүмүүс лайв мэдээгээр ярилцлага өгч, Оюутолгой, Тавантолгой ярьцгаан хийрхэв.
Мөн олон нийтийн сүлжээнд иргэд Христийн шашны сүмийнхэн олноороо ирсэн байгааг мэдээлцгээж байлаа. Эхлүүлсэн жагсаал нь эцгийнх нь эсрэг эргэж, согтуучуудаар дүүрсний дараа С.Эрдэнийн хүү Э.Одбаяр гэнэт ухаан орсон мэт мэдэгдэл хийж ‘Бид иргэдийнхээ эрхийг хамгаалахын төлөө, хариуцлага алдсан албан тушаалтныг огцруулах шаардлага тавьж, цугласан. Үр дүнд хүрсэн. Одоо турхиралтад автаж болохгүй. Энд Женкогийн Оюутолгой, Тавантолгой ярьсан өөр зорилготой хүмүүс эргэлдээд байна, тарцгаая’ гэж дуугарав. Арай л моячууд, МоАХ-ынхан ирсэн гэж хэлчихээгүй Э.Одбаяр их оройтож ухаарах шиг болов. Коронавирусын халдвар намжаагүй байгаа. Халдварын дэгдэлт ид үедээ явж байна. Ийм цагаар ард иргэдийг нэг дор цуглуулж, ковидын халдвар тараавал хэн хариуцлага хүлээх юм бол. Э.Одбаяр, Ц.Туваан, Д.Ганбат, Д.Адъяасүрэн нарт халдвар авч хохирсон иргэдийн эмчилгээний зардал, эрүүл мэндэд нөхөн төлбөр өгөх сэтгэл, чадвар хоёр бий юу. Иргэдэд учруулсан хохирлыг хүлээх хариуцлагын чадамж хэн, хэнд байгаа юу. Өвчний хөл хорио, өдөр тутмын амьдралаа залгуулж байгаа энгийн иргэдээ битгий хорло Ардчилсан намынхаан, зодооноо тогоондоо л үргэлжүүл.
Сэтгэгдэл бичих