УИХ дахь эмэгтэй гишүүдийн бүлгээс УОК-т хандан мэдэгдэл гаргасныг УИХ-ын дарга Г.Занданшатар чуулганы өнөөдрийн нэгдсэн хуралдаанд танилцуулав.
Энэ үеэр УИХ-ын дарга Г.Занданшатар, ‘Өнөөгийн хүнд цаг үед бид Монгол ёс, үнэт зүйл, хүний эрхийг гээх учиргүй. Өчигдөр Улсын Нэгдүгээр төрөх эмнэлэгт амаржсан Коронавирусний халдвартай ээжид гаргасан хандлага, бүдүүлэг алдааг бид тэвчих ёсгүй. Тиймээс энэ хандлага нийгмийг бүхэлд нь цочроож, нийгмийн сүлжээнд ч хэлэлцүүлэг өрнөж байна. Сэтгэл дутсан, ухаан дутсан, ажилдаа хүйтэн цэвдэг хандаж байгаа энэ дүр зурагтиай бид эвлэрэх ёсгүй. Энэ талаар УОК-т шаардлага хүргүүлж, асуудлыг ярьсан. УОК-ын дарга холбогдох хүмүүст харицлага тооцохоор үүрэг чиглэл өгч байгаагаа мэдэгдсэн. Хүнд цаг үед төрийн бүх шатанд хүнээ дээдэлсэн үйлчилгээний стандартыг эрүүл мэндийн болон бусад бүхий л байгууллагад нэвтрүүлэх хэрэгтэй болсныг энэ жишээ харуулж байна. УОК, НОК, ЭМЯ цар тахалтай тэмцэж, цаг наргүй ажиллаж байгааг ойлгож байгаа. Гэхдээ хариуцлагагүй үйлдэл гаргасан хүмүүст хариуцлага тооцож, нийгмийн хүлээлтэд шударга хандахыг шаардаж байна. Шинэ төрсөн ээж, түүний гэр бүлийнхэн, ард иргэдээсээ уучлалт гуйж байна’ гэлээ.
Сэтгэгдэл бичих