ЭМЯ-ны 11:00 цагийн мэдээллийн цагаар ХӨСҮТ-ийн Тандалт, судалгааны албаны дарга А.Амбасэлмаа ‘Өчигдөр батлагдсан тохиолдлууд өмнө нь бие нь өвдөж, эмнэл зүйн шинж тэмдэг илэрсэн үедээ эрүүл мэндийн байгууллагаар явсан байна. Тухайлбал, Төрийн тусгайгийн нэгдсэн эмнэлэгт нэг өвчтөн 2-3 удаа очиж, үзүүлсэн байна. Тиймээс тус эмнэлгийг хяналтад авч, 100-гаад ажилтнаас шинжилгээ авлаа. Урьдчилсан байдлаар сөрөг гарсан. Мөн Хавдар судлалын үндэсний төв халдвар авсан нэг хүн очиж үйлчилгээ авсан учир эмнэлгийн тусламж үзүүлсэн 21 хүнээс шинжилгээ авч, 10 хүнийг ойрын хавьтал гэж үзэн, тусгаарласан. Мөн ‘Энэрэл’ эмнэлэгт очсон байна. Тус эмнэлгийн 94 хүнд шинжилгээ хийсэн. Одоогийн байдлаар бүгдийнх нь хариу сөрөг гараад байна.
Батлагдсан тохиолдлын нэг хүн Хан-Уул дүүргийн Цагдаагийн газрын 1-р хэлтэст ажилладаг хүн байсан. Үүнтэй холбоотойгоор цагдаагийн газрын 100 гаруй хүнийг хяналтад авч, 10 хүнийг тусгаарласан.
Одоогоор нийслэлд идэвхтэй үргэлжилж байгаа голомт гэвэл БЗД-ийн 17-р хороо байна. 17-р хороонд хэд хэдэн гэр бүлийн хүмүүс өвдсөн. Одоогоор 30-аад хүн тухайн хороонд халдварт өртсөн байна. Мөн тус хорооны залгаа 9-р хорооны хоёр гэр бүлийн хүн мөн өвдсөн. Баянгол дүүргийн 4-р хорооны 1, 2-р байранд өвчлөл бүртгэгдсэн. Энэ мэтчилэн орон сууц, гудамж хороололд гарсан халдвар тархалт тасрахгүй байна. Иймд илрүүлэг шинжилгээг эрчимжүүлэн хийж байна. Өчигдөр БЗД-ийн 17-р хорооны 3000 гаруй хүнээс шинжилгээ авсан. 2000-аад хүний шинжилгээний хариу гарсан. Одоогоор халдвар илрээгүй байна’ гэлээ.
Эх сурвалж: eagle.mn
Сэтгэгдэл бичих