Монгол Улсад өнөөдрийн (2020.11.17, 11:00 цаг) байдлаар коронавирусний халдварын 434 тохиолдол бүртгэгдсэнээс 328 нь эдгэрээд байна. Гэрийн ажиглалтад 12, сувиллын ажиглалтад 16 иргэн байна гэж ХӨСҮТ-ээс мэдээллээ.
Энэ сарын 6-ны өдөр Сэлэнгэ аймгийн Алтанбулаг боомтоор орж ирсэн ачаа тээврийн автомашины жолооч Д-ын ойрын хавьтал болох есөн хүнээс (Жолооч Д + 9) халдвар илрээд байгаа.
Тэдний дотор жолооч Д-ын дүү болох МУБИС-ийн оюутан багтсан бөгөөд тэрбээр өөрийн явсан маршрутаа худал хэлснээс үүдэн өндөр эрсдэл үүсээд байна.
Учир нь дээрх оюутантай уулзсан иргэн Улсын нэгдүгээр төв эмнэлгийн гал тогооны ажилтантай хавьтал үүсгэсэн бөгөөд түүнийг тогтоон тусгаарлаад байна. Үүнтэй холбогдуулан тус эмнэлгийг ариутгах ажиллагаа явуулсан байна.
Одоогоор дээрх хавьтагч нарын шинжилгээний хариу хараахан гараагүй байгаа ба тусгаарлан, хянаж байна.
УНТЭ: Гал тогооны ажилтныг тусгаарласан
УНТЭ-ийн хэвлэлийн төлөөлөгчөөс тодруулахад ‘Одоогийн байдлаар манай эмнэлэгт хөл хорио тогтоогоогүй. Гал тогоо хэвийн ажиллаж байна. Эмнэлгийн амбулатори үзлэгээр өвчтнүүдээ үзэж байгаа. Хатуу дэглэмийн хөл хориотой байгаа учраас хаалганыхаа тоог цөөлсөн. Гэхдээ хавьтал болсон байж магадгүй гал тогооны ажилтныг тусгаарласан гэдэг нь үнэн. Түүний ойрын хавьтлыг нь тогтоогоод тусгаарласан гэсэн. Гэхдээ энэ талаар манай халдвар судлалын эмчээс тодруулаарай’ гэв. Бид энэ талаар УНТЭ-ийн халдвар судлалын эмчээс тодруулахад Мэдээлэл өгөх боломжгүй гэлээ’ хэмээн мэдээлжээ.
Энд нэг зүйлийг тэмдэглэхэд, халдвар тээгч болон хавьтагчийн хувийн мэдээллийг нууцлах нь зүй ёсны хэрэг. Харин тэдгээрийн зорчсон болон хавьтал байж болох хүмүүсийн маршрут, эрсдэл үүсгэж магадгүй бүсийг олон нийтэд зарлах нь өөрөө халдвараас сэргийлэх, түүний цар хүрээг хумихад дөхөм болно гэж үзэж байна.
Монгол Улсад анх Францын иргэн (Анх-Отгон) халдвартай гэж бүртгэгдэхэд түүний зорчсон болон явсан маршрутыг маш тодорхой олон нийтэд танилцуулсан нь нөхцөл байдалд сайнаар нөлөөлж байсныг энд жишээ болгоё.
Сэтгэгдэл бичих