Өнгөрсөн шөнө Европа лигийн дөрөв дүрээр тойргийн тоглолтууд болж өнгөрсөн билээ. Хамгийн их анхаарал татаж байсан тоглолт бол ‘E’ хэсгийн Английн Арсенал клуб Португалийн Спортинг Лисбоны талбайд зочлон тоглох байлаа.
Тус тоглолтын 25 дахь минутад 27 настай Английн шигшээ багийн довтлогч Дэнни Уэлбэк шагайндаа гэмтэл авч дамнуургын тусламжтайгаар талбайг чөлөөлжээ.
Энэ талаар Арсеналын дасгалжуулагч Унай Эмэри: “Уэлбэк одоо эмнэлэгт байгаа түүний өмнө гэмтэж байсан шагай учраас бид үнэхээр их санаа зовж байна. Одоо эмч нарын дэлгэрэнгүй хариуг хүлээж байна” хэмээжээ.
Тус тоглолтод хоёр баг 0:0-ээр тэнцжээ. Гэхдээ Арсенал хэсгээ 10 оноотой итгэл төгс тэргүүлж байгаа бол Спортинг долоо оноотойгоор хоёр дугаар байранд бичигдэж байна. Бусад том клубууд болох Челси, Севияа, Сэлтик, Спартак Москва нар хожил байгуулж чаджээ.
Сэтгэгдэл бичих