Монголын хамгийн том сургууль хэмээн өөрсдийгөө өргөмжилсөн Монголын Үндэсний Их сургууль орон нутгаас ирж, суралцаж, тус сургуулийн дотуур байранд амьдардаг оюутнуудаа гудамжинд гаргаад байгаа юм. Цаашлаад коронавирусын хөл хориотой холбоотойгоор сургуулиудын үйл ажиллагааг өнгөрсөн хоёрдугаар сард зогсоосноор орон нутгаас Улаанбаатарт ирж суралцдаг оюутнууд өнгөрсөн хоёрдугаар сараас дотуур байранд байгаагүй юм.
Оюутнууд 2020 оны хичээлийн шинэ жил эхлэхэд дотуур байрны нэг жилийн төлбөр болох нэг саяас 1.5 сая төгрөгийг тушаасан байжээ. Харин энэ хичээлийн жил эхлэхэд оюутнууд дотуур байрандаа суухаар ирэхэд сургуулийн удирдлагууд дахин бүтэн жилийн төлбөрөө төлөхийг шаардсан байна. Оюутнууд өнгөрсөн жил ‘суугаагүй‘ зургаан сарын төлбөрөө буцаан авах, эсвэл мөн хугацаатай дүйхүйц хугацаанд дотуур байранд төлбөргүй суух хүсэлтийг сургуулийн захиргаанд удаа дараа тавьсан ч хүлээн аваагүй аж. Бусад сургуулиудын хувьд оюутнууддаа уян хатан байдлаар хандаж байхгүй хугацааных нь нөхөн олголт хийж байгаа юм.
Тодруулбал, МҮИС-ийн удирдлагууд ‘Коронавиус биднээс шалтгаалж дэгдээгүй. Сургуулийн үйл ажиллагааг бид зогсоогоогүй учир төлбөрийг буцаан олгох болон дүйцэх хугацаанд төлбөргүй суулгах боломжгүй. Хуулийн байгууллагад хандаж болно’ гэсэн хариуг оюутнуудад өгсөн байна. Тиймээс оюутнууд орох газаргүй болсон тул нэг хэсэг нь дахин нэг жилийн төлбөрөө төлж дотуур байрандаа орж, зарим нь айлын хажуу өрөө, нийтийн байранд амьдрахаар явж, бас зарим нь асуудал шийдэгдэх байх хэмээн найдаж, найз нөхдийнхөө гэрээр ээлжлэн хоног төөрүүлж яваа гэнэ.
Эцэг эхээсээ хол, олны газарт бие даан суралцахаар яваа 18-22 насны залуус ийнхүү МҮИС-ийн удирдлагуудын хахир хатуу, хүн чанаргүй шийдвэрийн өмнө хүчин мөхөстөж, гудамжинд гарах дээрээ тулаад байгаагаа учирлаж байна. Харж хамгаалах хүнгүй яваа тэдний асуудлыг салбар яам анхааралдаа авч, оюутан залуус очих газаргүйгээс аливаа эрсдэлд өртөхөөс тэд айж байна.
Эх сурвалж.Tsahiur.mn
Сэтгэгдэл бичих