Нөхрөөсөө салж, төрсөн гэртээ харьсан эмэгтэйг төрхөмдөө буцлаа гэдэг. Тэгвэл намын даргаа дагаж нүүсэн АН дарга буухтай зэрэгцэн “төрхөмдөө буцжээ”. Тодруулбал, АН “Ардчиллын өргөө”-гөөс нүүж, Төв шуудангийн урд байрлах хуучин байрандаа нүүж ирсэн байна.
АН хуучнаар “Шонхор тауэр” буюу “Ардчиллын өргөө”-нд нүүж орсон огноо нь 2017 оны хоёрдугаар сарын 13. Өөрөөр хэлбэл, АН-ын даргаар С.Эрдэнэ сонгогдсоны дараа АН “Ардчиллын өргөө” рүү нүүсэн юм. АН-ын даргын сонгууль 2017 оны нэгдүгээр сарын 29-нд болж, хамгийн олон гишүүний саналаар С.Эрдэнэ сонгогдож байв.
Тэрбээр УИХ-ын 2020 оны сонгуульд ялагдсаны хариуцлагаа хүлээж, намын даргын үүргээс чөлөөлөгдөх өргөдлөө өнгөрсөн зургаадугаар сард өгсөн. Үүний дараа АН “Ардчиллын өргөө”-гөөс нүүж, ийнхүү хуучин байрандаа ирлээ.
АН-ыг “Ардчиллын өргөө”-нд нүүж орох үеэр хөгжлийн бэрхшээлтэй хүүхдүүдийн хөгжлийн төв барих зориулалтаар барилга барих зөвшөөрөл авсан ч намын байр болголоо гэх шүүмжлэл гарч байсан. Энэ талаар АН-ын даргаар ажиллаж байсан С.Эрдэнэ АН дөрөв, тавдугаар давхрыг ашиглалтын зардлыг нь өгч, эзэмшиж байгаа гэсэн тайлбарыг өгч байв.
Сэтгэгдэл бичих