Гүржийн Ерөнхийлөгч асан Михаил Саакашвили “Нэгдмэл үндэсний хөдөлгөөн” нам нь парламентын сонгуульд ялсан тохиолдолд Гүржийн Засгийн газрын тэргүүнээр ажиллахаа зөвшөөрлөө. Гэхдээ тэрбээр хоёр жилийн хугацаанд Ерөнхий сайдаар ажиллана гэж даваа гарагт мэдэгджээ.
“Би Ерөнхий сайдаар бүтэн ажиллахгүй. Дээд тал нь хоёр жил л ажиллана. Энэ хоёр жил бол улс орноо намаг балчгаас гаргаж, урагш ахихад хангалттай хугацаа. Би үүнд итгэлтэй байна” гэж Саакашвили тэмдэглэжээ. Түүнчлэн тэрбээр төрийн тэргүүнээр ажиллаж байх хугацаандаа гаргасан алдаануудынхаа төлөө ард түмнээсээ уучлалт хүссэн байна. Мөн уучлалт гуйгаад зогсохгүй, алдаагаа засах нь хамгийн чухал гээд, алдаагаа засах боломж өгөхийг хүсчээ.
Саакашвилийн үүсгэн байгуулсан “Нэгдмэл үндэсний хөдөлгөөн” нам даваа гарагт Гүржийн экс Ерөнхийлөгчийг Ерөнхий сайдын суудалд дэвшүүлсэн юм. Саакашвили өнгөрөгч наймдугаар сард Гүрж рүүгээ буцах бодолтойгоо зарласан. Энэ улсад ирэх 10 дугаар сарын 31-нд парламентын сонгууль болно.
Саакашвили нь 2004 оны нэгдүгээр сараас 2013 оны 11 дүгээр сар хүртэл Гүржийн Ерөнхийлөгчөөр ажиллаж байсан. 2013 онд тэрбээр Ерөнхийлөгчийн бүрэн эрхийн хугацаа нь дуусахаас хэдхэн хоногийн өмнө улс орноосоо зугтсан юм. Энэ үйл явдлын дараа түүнд эрүүгийн 4 хэрэг үүсгэж, хоёрыг нь шүүхээр хэлэлцэн шийдвэр гаргасан. Гүржийн экс Ерөнхийлөгчид 11 жилийн хорих ял оногдуулсан байна. Харин 2015 оны 12 дугаар сард Саакашвилийн Гүржийн иргэншлийг нь хасчээ.
Сэтгэгдэл бичих