Дэлхийн хамгийн чинээлэг эрхмүүдийн жагсаалтад Америкийн бизнес эрхлэгч Илон Маск “Facebook” компанийг үүсгэн байгуулагч Марк Цукербергийг ардаа орхиж, гуравдугаарт бичигдэх болжээ.
Шинжээчдийн тооцоолсноор, “Tesla”, “SpaceX” компанийг үүсгэн байгуулагчийн хөрөнгө 111.3 тэрбум ам.доллар давжээ. Тийнхүү И.Маск “Facebook” нийгмийн сүлжээг үүсгэн байгуулагчаас илүү баян болов. М.Цукербергийн хөрөнгө 110.5 тэрбум ам.доллароор үнэлэгдэж байна.
“Microsoft” корпорацийг үүсгэн байгуулагч Билл Гейтс жагсаалтын хоёрдугаарт бичигдэж байгаа бол цахим худалдаа эрхэлдэг “Amazon” корпорацийг үүсгэн байгуулагч Жефф Безос жагсаалтыг тэргүүлсэн хэвээр байна. Түүний хөрөнгө 200 тэрбум ам.доллароор үнэлэгдэж байна.
“Tesla” компанийн хувьцаа огцом нэмэгдсэн нь И.Маскийн хөрөнгө нэмэгдэх гол шалтгаан болжээ. Он гарснаас хойш компанийн хувьцаа 475 хувиар өссөнөөр компанийг үүсгэн байгуулагч 76 тэрбум ам.доллароор баяжсан байна.
Эх сурвалж:Bloomberg
