АНУ, Ираны дайны улмаас газрын тосны үнэ өсөж, инфляц нэмэгдэх эрсдэл үүссэн нь алтны үнэд сөргөөр нөлөөлж байна. Спот алтны үнэ Даваа гаригт /2026.09.28/3.3 хувиар буурч, унци нь 4,146.51 ам.долларт хүрсэн байна. Энэ нь өнгөрсөн наймдугаар сарын 5-наас хойших хамгийн доод үзүүлэлт болжээ. Мөн АНУ-ын алтны фьючерсийн үнэ 3.3 хувиар буурч, 4,178.40 ам.доллар болсон байна.
Газрын тосны үнэ өсөж, ам.долларын ханш чангарч, АНУ-ын засгийн газрын бондын өгөөж нэмэгдсэнээр хөрөнгө оруулагчдын дунд инфляц дахин эрчимжих болгоомжлол нэмэгджээ.
Алтыг ихэвчлэн инфляцын үед үнэ цэнээ хадгалах хөрөнгө гэж үздэг. Гэвч бодлогын хүү болон бондын өгөөж өсөх үед алт хүүгийн орлого өгдөггүй. Тиймээс хөрөнгө оруулагчид бонд зэрэг өгөөжтэй хөрөнгөд мөнгөө шилжүүлэх хандлагатай болдог байна.
АНУ-ын Холбооны нөөцийн банк энэ сарын эхээр бодлогын хүүгээ 0.25 нэгж хувиар нэмэгдүүлсэн бөгөөд цаашид дахин хүү өсгөх боломжтойг мэдэгдсэн юм.
Үүний зэрэгцээ АНУ-ын ам.долларын ханш сүүлийн хоёр сарын хамгийн өндөр түвшинд хүрсэн бол газрын тосны үнэ ойролцоогоор гурван хувиар өссөн байна. АНУ-ын ерөнхийлөгч Дональд Трамп Ираны талын мөргөлдөөнийг зогсоох, Ормузын хоолойг дахин нээх саналыг хүлээн авахаас татгалзсантай холбоотойгоор газрын тосны үнэ өссөн байна.
Зарим эдийн засагч, бодлого боловсруулагчид газрын тосны үнэ өссөнөөр инфляцын дарамт нэмэгдэх эрсдэлтэйг анхааруулжээ. Улмаар бодлогын хүүг өндөр түвшинд хадгалах шаардлага үүсч болзошгүй гэж үзэж байна.
Алтнаас гадна бусад үнэт металлын үнэ ч буурчээ. Тухайлбал, мөнгөний үнэ 4.7 хувь, платин 2.9 хувь, палладий 4.4 хувиар тус тус буурсан байна.
Сэтгэгдэл бичих