Японы засгийн газраас зургадугаар сарын 30-нд танилцуулснаар 2024 оны санхүүгийн жилд идэж болох байсан ч хаягдсан хүнсний хэмжээ өмнөх оноос 30 мянган тонноор буурч, ойролцоогоор 4.61 сая тоннд хүрсэн байна. Ийнхүү Японы идэж болох хүнсний хог хаягдлын хэмжээ гурав дахь жилдээ дараалан буурч буй юм.
Япончууд хүнсний банкуудад хандив өргөхийг дэмжих замаар энэ төрлийн хог хаягдлыг бууруулахаар ажиллаж байна. Хүнсний банкууд нь хэрэглэх боломжтой хүнсний бүтээгдэхүүнүүдийг цуглуулж, нэн шаардлагатай хүмүүст нь тараадаг.
Мөн хугацаанд хүнс үйлдвэрлэгч зэрэг аж ахуйн нэгжүүдийн хаясан хүнсний хэмжээ 2.37 сая тонн болж, өмнөх санхүүгийн жилээс 60 мянган тонноор өссөн байна. Энэ нь Covid-19 цар тахлын дараа хүмүүс гадуур хооллох нь ихэссэнтэй холбоотой аж. Засгийн газар энэ төрлийн мэдээллийг 2012 оны санхүүгийн жилээс хойш цуглуулж байна.
Харин айл өрхүүдийн хүнсний хог хаягдлын хэмжээ 90 мянган тонноор буурч, 2.24 сая тонн болжээ. Энэ нь иргэд улам ухамсартай болж буйг илтгэнэ.
Засгийн газар 2030 оны санхүүгийн жил гэхэд аж ахуйн нэгжүүдийн хүнсний хаягдлыг 2.19 сая тонн, өрхийн хүнсний хаягдлыг 2.16 сая тонн бууруулах зорилт тавьжээ. 2024 оны санхүүгийн жилд хүнсний хаягдлаас үүдэн 3.8 их наяд иенийн эдийн засгийн алдагдал учирсан аж. Үүнийг хүн амын тоонд хуваагаад үзвэл нэг хүнд дунджаар 31,097 иен ногдож байна.
Харин дэлхийн хэмжээнд 2022 онд 1.05 тэрбум тонн хүнс хаягдсаныг НҮБ 2024 онд тайлагнажээ.
Сэтгэгдэл бичих