Х.Тэмүүжин нарын 17 гишүүнээс Монгол Улсын Их Хурлын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн төслүүдийг Улсын Их Хуралд өргөн бариад байна. Уг төсөл нь “УИХ-ын дарга намаасаа түдгэлздэг байх” зохицуулалтыг тусгаснаараа онцлогтой юм.
Тэгвэл энэ долоо хоногийн Монгол Улсын Их Хурал-ын чуулганы нэгдсэн хуралдаанаар дээрх хуулийн төслийг хэлэлцэх эсэхийг шийдвэрлэхээр төлөвлөжээ.
Хуулийн төсөлд УИХ-ын даргыг сонгох болон бүрэн эрхийг хэрэгжүүлэхтэй холбоотой хэд хэдэн зохицуулалтыг тодорхой тусгасан байна. Тухайлбал, олонх нам УИХ-ын даргад нэр дэвшүүлж, гишүүд ил санал өгөх замаар нийт гишүүдийн олонхын саналаар сонгох зарчим хэвээр хадгалагдсан байна. Харин нэр дэвшигч шаардлагатай олонхын дэмжлэг авч чадаагүй тохиолдолд өөр нэр дэвшигчийг дахин санал болгох зохицуулалтыг тусгажээ.
Мөн УИХ-ын дарга нь улс төрийн намуудаас ангид, бие даасан, төвийг сахисан байр сууринаас бүрэн эрхээ хэрэгжүүлэх ёстойг тодотгосон байна. Үүнээс гадна олон улсын парламентын байгууллагуудын хүрээнд хүлээсэн үүргээс бусад давхар албан тушаал эрхлэхийг хориглох зохицуулалт багтжээ.
Хамгийн анхаарал татаж буй заалт нь УИХ-ын дарга бүрэн эрхийн хугацаандаа намаасаа түдгэлзэх тухай заалт юм. Гэхдээ уг түдгэлзэлт нь тухайн улстөрчийг дараагийн сонгуулиудад намаасаа нэр дэвших эрхийг хязгаарлахгүй байхаар тусгасан байна.
Ийнхүү парламентын даргын институцийн бие даасан байдал, төвийг сахисан байр суурийг бэхжүүлэх зорилготой энэхүү хуулийн төслийг УИХ хэлэлцэх эсэх нь улс төрийн хүрээнд анхаарал татсан асуудлын нэг болоод байна.
Сэтгэгдэл бичих