Ойрх Дорнодын бүс нутагт үүсээд буй хурцадмал нөхцөл байдал дэлхийн эрчим хүчний зах зээлд хүчтэй нөлөөлж, шатахууны нийлүүлэлт тасалдах эрсдэл нэмэгдсэнээр олон улсад түлшний хомсдол үүсч, үнэ огцом өсөөд байна.
Үүнтэй холбоотойгоор улс орнууд яаралтай хариу арга хэмжээ авч эхэлжээ.
Филиппин улсын Ерөнхийлөгч Фердинанд Маркос үндэсний хэмжээнд эрчим хүчний онц байдал зарлаж, түлшний импортыг нэмэгдүүлэх, тээврийн салбарт санхүүгийн дэмжлэг үзүүлэх шийдвэр гаргав.
Европын орнуудаас Ирланд улс шатахууны онцгой албан татварыг тэглэж, үнийн өсөлтийн дарамтыг бууруулах арга хэмжээ авчээ. Харин Словени улс шатахууныг хязгаартай олгож эхэлсэн байна.
Азийн томоохон эдийн засгууд ч мөн хариу арга хэмжээ авч эхэлсэн бөгөөд Хятад улс шатахууны үнийн өсөлт түүхэн дээд хэмжээнд хүрсэнтэй холбогдуулан стратегийн нөөцөө зах зээлд гаргаж, үнийн тогтвортой байдлыг хангахыг зорьж байна. Өмнөд Солонгос улс шатахууны хэрэглээг бууруулах үндэсний аян өрнүүлж, автомашины хэрэглээг багасгахыг иргэддээ уриалжээ.
Харин хөгжиж буй орнуудад түлшний хомсдол илүү хүнд тусаж байна. Шри Ланк улс шатахууныг хязгаартай олгож эхэлсэн төдийгүй төрийн байгууллагуудыг долоо хоногт дөрвөн өдөр ажиллуулах шийдвэр гаргаж, Лхагва гарагийг амралтын өдөр болголоо.
Мөн Бангладеш улс шатахууны хэрэглээнд хязгаарлалт тогтоож, Камбож улсад хийн түлшний хомсдол үүссэнээр нийтийн тээврийн үйл ажиллагаа доголдож, иргэдийн өдөр тутмын амьдралд сөргөөр нөлөөлж эхэлсэн байна.
Эх сурвалж: BBC, CNN, Reuters, Al Jazeera, AFP
Сэтгэгдэл бичих