“Гэрэгэ тауэр”-ын 14 давхартай холбоотой маргаан олон нийтийн анхаарлын төвд орж, холбогдох этгээдийг гэрчийн хамгаалалтад авах шийдвэрийн талаар Хууль зүй, дотоод хэргийн сайд Б.Энхбаяр мэдэгдлээ.
Тодруулбал, иргэн П.Хишигбаяр өчигдөр олон нийтэд хандан хийсэн мэдэгдэлдээ 2021 онд тус барилгын 14 давхрыг “Херо энтертайнмент” компанид 1 сая ам.доллараар худалдахаар тохирсон ч төлбөр хийгдээгүй гэж мэдэгдсэн юм. Тэрбээр мөн Ерөнхий сайд Л.Оюун-Эрдэнэ болон Б.Баатар нартай холбоотойгоор дарамт, заналхийлэлд өртөж байсан гэж мэдүүлжээ.
Түүнчлэн П.Хишигбаяр “2025 оны нэгдүгээр сард надад хэрэг тохож, 19 хоног цагдан хорьсны дараа “Гэрэгэ тауэр”-ын 14 давхрыг үнэ төлбөргүй шилжүүлэн авсан. Цагдан хоригдож байх хугацаанд 1.5 тэрбум төгрөгийг манай дансанд шилжүүлсэн байсан” хэмээн мэдэгдсэн байна.
Энэ асуудалтай холбоотойгоор тэрбээр өөрийг нь “хонгил”-ын хэлбэрээр хэлмэгдүүлсэн гэж үзэж байгаагаа илэрхийлж, нэр бүхий албан тушаалтнуудтай нээлттэй уулзахад бэлэн гэдгээ мэдэгдсэн юм.
Харин Хууль зүй, дотоод хэргийн сайд Б.Энхбаяр уг асуудалд анхаарал хандуулж, П.Хишигбаярыг гэрчийн хамгаалалтад авах боломжийг судалж байгаа талаар мэдэгдэв. Энэ нь тухайн хэрэгт холбогдох мэдээлэл, мэдүүлгийг аюулгүй нөхцөлд авах зорилготой аж.
Одоогоор уг асуудлаар нэр дурдагдсан албан тушаалтнууд болон “Херо энтертайнмент” компанийн зүгээс албан ёсны тайлбар хийгээгүй байна.
Сэтгэгдэл бичих