8 тэрбум вонын цахим мөрийтэй тоглоомын сүлжээг Солонгост илрүүлэн Монголын иргэдийг баривчиллаа
Өмнөд Солонгосын Чэжү мужийн цагдаагийн байгууллага Монгол иргэдийг онилсон, 18 тэрбум вонын бооцооны эргэлттэй хууль бус цахим мөрийтэй тоглоомын сүлжээ ажиллуулж байсан бүлэг этгээдийг илрүүлэн баривчилжээ.
Тус бүлэглэл нь Чэжү хотын орон сууцны гурван байрыг түрээслэн, тэндээсээ баккара, слот зэрэг казино төрлийн тоглоом ажиллуулж байсан аж. Цагдаа нарын мэдээлснээр зохион байгуулалттай уг сүлжээнд солонгос болон монгол иргэд оролцож, үүргээ хуваан ажилладаг байжээ.
Мөрдөн шалгалтаар тэд 2025 оны 10-р сараас эхлэн сошиал сүлжээгээр дамжуулан Монгол иргэдийг элсүүлж, 6 сарын хугацаанд 8000 орчим хэрэглэгч татсан нь тогтоогдсон байна. Нийт бооцооны хэмжээ 18 тэрбум вон хүрч, хууль бус орлогоос багадаа 680 сая вон олсон гэж үзжээ.
Цагдаагийнхан ажиллагааны үеэр компьютер, бэлэн мөнгө болон тансаг зэрэглэлийн автомашинуудыг хураан авчээ. Хэргийг зохион байгуулсан гол этгээдийн нэг нь гадаад руу оргон зайлсан бөгөөд Интерполоор эрэн сурвалжилж эхэлсэн байна. Солонгосын цагдаагийн байгууллага баривчлагдсан Монгол иргэдийн нэр, нас, хүйсийг албан ёсоор мэдэгдээгүй байгаа ч солонгосын хэвлэлүүдээр Монголын 4 иргэн баривчлагдсан, тэдний 2 нь орогнол хүсэгч, 2 нь хууль бус оршин суугч байсан гэж мэдээлсэн байна.
Сэтгэгдэл бичих